Ատոմային էներգիայի միջազգային գործակալության ղեկավարը կոչ է արել արդիականացնել ՄԱԿ-ը և այն ավելի արդյունավետ դարձնել
1 րոպեի ընթերցում
Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին ով հավակնում է ՄԱԿ-ի գլխավոր քարտուղարի պաշտոնին, հայտարարել է, որ ՄԱԿ-ը պետք է արդիականացվի և նրա կառուցվածքը դառնա ավելի արդիական։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։
«Մենք պետք է ՄԱԿ-ը վերադարձնենք բնականոն հուն։ Մեզ անհրաժեշտ է ավելի մասնագիտացված և համապատասխան չափի կազմակերպություն։ ՄԱԿ-ի գործառույթներն իրականացնելը լիովին հնարավոր է ավելի արդյունավետ կառուցվածքով», - ասել է Գրոսսին։
ԱԷՄԳ-ի ղեկավարը նշել է, որ ՄԱԿ-ի չափազանց շատ գործակալություններ կատարում են նույն աշխատանքը, որոշ դեպքերում եռապատկելով կամ նույնիսկ քառապատկելով առաջադրանքները, ինչը, նրա խոսքով, տեղի է ունենում օրինակ կլիմայի և զարգացման ծրագրերի շրջանակներում։
Անցյալ շաբաթ Գրոսսին քննադատել էր ՄԱԿ-ի ներկայիս վիճակը՝ պնդելով, որ կազմակերպությունը չի մասնակցում աշխարհում բազմաթիվ հակամարտությունների կարգավորմանը։