Օմանի և Իրանի արտաքին գործերի նախարարներն արտահայտվել են Հորմուզի նեղուցում ազատ նավարկության օգտին
1 րոպեի ընթերցում
Օմանի արտաքին գործերի նախարար Բադր ալ-Բուսաիդին և նրա իրանցի գործընկեր Աբբաս Արաղչին հունիսի 16-ին վերահաստատել են իրենց երկրների հանձնառությունը Հորմուզի նեղուցում ազատ նավարկությանը։ «Արմենպրես»-ի հաղորդմամբ՝ այս մասին տեղեկացրել է Օմանի արտաքին քաղաքական գերատեսչությունը։
Կառույցի տարածած մամուլի հաղորդագրությունից տեղեկանում ենք, որ հեռախոսազրույցի ընթացքում նախարարները վերահաստատել են իրենց երկրների հանձնառությունը միջազգային իրավունքի այն նորմերին, որոնք վերաբերում են Հորմուզի նեղուցում անվտանգ և ազատ ծովային նավարկությանը։
Նրանք նաև հույս են հայտնել, որ առաջիկա ժամանակահատվածում բոլոր կողմերը կգործադրեն լուրջ և համաձայնեցված ջանքեր՝ տարածաշրջանում անվտանգության և կայունության պահպանման նպատակով արդյունավետ և կառուցողական քաղաքական ու դիվանագիտական գործընթացի համար բարենպաստ և կայուն միջավայր ապահովելու ուղղությամբ։
Ավելի վաղ շվեյցարական լրատվամիջոցները, վկայակոչելով երկրի արտաքին գործերի նախարարությանը, հայտնել էին, որ հունիսի 19-ին Շվեյցարիայի Բյուրգենշտոկ քաղաքում Իրանի և Միացյալ Նահանգների միջև համաձայնագիր կստորագրվի։