2 րոպեի ընթերցում
ԱՄՆ նախագահ Դոնալդ Թրամփը Ֆրանսիայում Մեծ յոթնյակի գագաթնաժողովի ժամանակ հայտարարել է, որ նոր համաձայնագրով Իրանը երբեք չի ստանա միջուկային զենք ստեղծելու կամ ձեռք բերելու հնարավորություն։ «Արմենպրես»-ի փոխանցմամբ՝ այս մասին հաղորդում է BBC-ն:
«Նրանք այն չեն մշակելու, նրանք այն չեն գնելու, նրանք դրա հետ կապված ոչինչ չեն անելու», - ասել է Թրամփը Կատարի էմիր Թամիմ բին Համադ ալ Թանիի հետ կայացած հանդիպման ընթացքում։
Նա հավելել է, որ սա «արդար» և «լավ» գործարք է։
Թրամփը նաև նշել է, որ այժմ Իրանի հետ համաձայնությունն անցնում է «երկրորդ փուլ»։
Ավելի վաղ իրանցի և ամերիկացի պաշտոնյաները հայտարարել էին, որ հունիսի 19-ին Իրանի հետ փոխըմբռնման հուշագրի ստորագրումից հետո 60 օրվա ընթացքում կողմերը բանակցություններ կվարեն վերջնական համաձայնագրի կնքման համար։
ԱՄՆ նախագահը նաև ընդգծել է, որ ԱՄՆ-ն գումար չի ներդնի Իրանում։ Ավելի վաղ տեղեկություններ էին տարածվել, որ ԱՄՆ-ն և նրա դաշնակիցները 300 միլիարդ դոլարի ծրագիր կպատրաստեն Իրանի ենթակառուցվածքները վերականգնելու համար։ ԱՄՆ փոխնախագահ Ջեյ Դի Վենսն էլ հայտարարել էր, որ Իրանը կարող է հասանելիություն ստանալ միլիարդավոր դոլարի հիմնադրամին, եթե երկիրը կատարի Միացյալ Նահանգների հետ կնքված համաձայնագրում նշված պարտավորությունները։ Ընդ որում, նա ընդգծել էր, որ ամերիկացի հարկատուները դրա համար չեն վճարի։