Բուլղարիայի վարչապետը շնորհավորել է Նիկոլ Փաշինյանին ընտրություններում հաղթանակի կապակցությամբ

Բուլղարիայի վարչապետ Ռումեն Ռադևը շնորհավորել է ՀՀ վարչապետ Նիկոլ Փաշինյանին հունիսի 7-ին կայացած խորհրդարանական ընտրություններում տարած հաղթանակի կապակցությամբ։ «Արմենպրես»-ի հաղորդմամբ՝ այս մասին հայտնում է Բուլղարիայի կառավարության մամուլի ծառայությունը։

«Շնորհավորում եմ Նիկոլ Փաշինյանին՝ հունիսի 7-ին Հայաստանում անցկացված խորհրդարանական ընտրություններում հաղթանակի կապակցությամբ»,- ասված է ուղերձում։

Բուլղարիայի վարչապետը նաև հույս է հայտնել, որ երկու երկրների միջև համագործակցությունը կշարունակի զարգանալ։

«Ակնկալում եմ սերտ համագործակցություն Բուլղարիայի և Հայաստանի միջև գերազանց հարաբերությունների հետագա ամրապնդման համար՝ փոխադարձ հետաքրքրություն ներկայացնող բոլոր ոլորտներում»,- նշել է Ռադևը։

Հայաստանում հունիսի 7-ին տեղի են ունեցել խորհրդարանական ընտրություններ, որոնց նախնական արդյունքներով խորհրդարան են անցնում երեք քաղաքական ուժ՝ «Քաղաքացիական պայմանագիր» կուսակցությունը (727 հազար 827 ձայն կամ 49,825 տոկոս), որը իր ստացած ձայների շնորհիվ խորհրդարանում մեծամասնություն կստանա և կձևավորի կառավարություն, ինչպես նաև՝ «Ուժեղ Հայաստան» դաշինքը (340 հազար 088 ձայն կամ 23,281 տոկոս) և «Հայաստան» դաշինքը (145 հազար 113 ձայն կամ 9,934 տոկոս)։ Նախնական տվյալներով խորհրդարան անցնելու անցողիկ շեմին՝ 4 տոկոսին շատ մոտ է նաև «Բարգավաճ Հայաստան» կուսակցությունը՝ 3.996 տոկոսով։ ԲՀԿ-ն արդեն իսկ հայտարարել էր, որ դիմելու է ԿԸՀ մի շարք ընտրատեղամասերում վերահաշվարկ իրականացնելու համար։ Վերահաշվարկի անհրաժեշտության մասին հայտարարել էին այլ քաղաքական ուժեր ևս։