2 րոպեի ընթերցում
Վաշինգտոնի մոտեցումը Թեհրանի հետ բանակցությունների նկատմամբ հիմնված կլինի այն բանի վրա, թե նախագահ Դոնալդ Թրամփն ինչը լավագույնը կհամարի ամերիկացիների համար՝ անկախ Իսրայելի հետ հնարավոր տարաձայնություններից: «Արմենպրես»-ի փոխանցմամբ՝ այս մասին հայտարարել է ԱՄՆ փոխնախագահ Ջեյ Դի Վենսը Fox News-ի հետ հարցազրույցում։
«Իսրայելցիներն ու Միացյալ Նահանգները շատ ընդհանուր շահեր ունեն: Բայց կան որոշ իրավիճակներ, երբ մեր շահերը տարբերվում են, և, ես կարծում եմ, որ նախագահը շատ հստակ ցույց է տվել, որ թեև Իսրայելն ակնհայտորեն ինչ-որ նպատակներ ունի, Իրանում Միացյալ Նահանգների գլխավոր նպատակն է ապահովել, որ Իրանը միջուկային զենք չունենա», - ասել է Վենսը։
Նրա խոսքով՝ Թրամփը հավատում է, որ ներկա պայմաններում իրատեսական է Իրանի միջուկային խնդրի երկարաժամկետ կարգավորումը։
Դրա հետ մեկտեղ փոխնախագահն ընդգծել է, որ Վաշինգտոնը թերահավատորեն կվերաբերվի Իրանի հետ ցանկացած համաձայնության և առաջնահերթ ուշադրություն կհատկացնի մոնիթորինգին։
Վենսն ընդունել է երկարաժամկետ համաձայնագրի հասնելու դժվարությունը, բայց հայտարարել է, որ ԱՄՆ-ն դրա համար լծակներ ունի։
«Դա դժվար խնդիր է, բայց նախագահը մեզ շահավետ դիրք է ապահովել դրան հասնելու համար։ Քանի որ, եկեք անկեղծ լինենք, իրանցիները չեն ցանկանում, որ այս պատերազմը շարունակվի», - ընդգծել է ԱՄՆ փոխնախագահը։