Բյուրեղավանի «Ուժեղ Հայաստան»-ի տարածքային գրասենյակի ղեկավարը կուսակցության օգտին քվեարկելու պայմանով ընտրակաշառք է տվել․ կան ձերբակալվածներ

Հակակոռուպցիոն կոմիտեի և ՆԳՆ քրեական ոստիկանության Կոտայքի մարզային վարչության ծառայողների կողմից իրականացված միջոցառումների արդյունքում փաստական տվյալներ են ստացվել այն մասին, որ «Ուժեղ Հայաստան» կուսակցության Կոտայքի մարզի Բյուրեղավան համայնքի տարածքային գրասենյակի ղեկավարը կուսակցության օգտին քվեարկելու պայմանով նույն համայնքի բնակչին խոստացել, ինչպես նաև տվել է ընտրակաշառք:

«Արմենպրես»-ն այս մասին տեղեկանում է Կոմիտեի տարածած հաղորդագրությունից և ձայնագրությունից, որոնց մեջ նաև նշվում է, որ դեպքի առթիվ ՀՀ հակակոռուպցիոն կոմիտեում նախաձեռնվել է քրեական վարույթ, ձերբակալվել են մեղադրյալներ, կատարվել խուզարկություններ և վարութային այլ գործողություններ։