5 րոպեի ընթերցում
«Ազատություն» պրեմիում դասի բազմաֆունկցիոնալ համալիրում կներդրվեն ճապոնական առաջատար Mitsubishi Electric-ի ինժեներական համակարգերը․ համագործակցության հուշագիր է ստորագրվել «Կոնսէլ» ընկերության հետ
«Ազատություն» պրեմիում դասի բազմաֆունկցիոնալ համալիրը շարունակում է ընդլայնել միջազգային համագործակցությունները՝ Երևանում բարձրակարգ բնակելի միջավայր ձևավորելու իր ռազմավարության շրջանակում։
Մայիսի 27-ին «Ազատություն» համալիրը և Mitsubishi Electric-ի հայաստանյան պաշտոնական ներկայացուցիչ «Կոնսէլ» ընկերությունը համագործակցության հուշագիր կնքեցին։
Ճապոնական Mitsubishi Electric-ը կլիմայական համակարգերի ոլորտի համաշխարհային առաջատարներից է, որը հայտնի է որպես ինժեներական բարձր ստանդարտների և նորարարության խորհրդանիշ։ Այս ապրանքանիշի լուծումները կիրառվում են աշխարհի բազմաթիվ երկրների պրեմիում բնակելի և այլ նշանակության համալիրներում, որտեղ առաջնային են ոչ միայն հարմարավետությունը, այլև կայունությունն ու երկարաժամկետ արդյունավետությունը։
Հենց այս սկզբունքներով առաջնորդվելով էլ «Ազատություն» համալիրը ինժեներական համակարգերի ընտրության հարցում նախապատվությունը տվել է Mitsubishi Electric ապրանքանիշին։ Հայաստանում ապրանքանիշի պաշտոնական ներկայացուցիչ «Կոնսէլ» ընկերությունը ոլորտի փորձառուներից է, որը շուրջ 25 տարի իրականացնում է առաջատար ինժեներական լուծումների նախագծում, մատակարարում և ներդրում՝ ապահովելով դրանց հուսալի, արդյունավետ և միջազգային չափանիշներին համապատասխան շահագործումը։
Համագործակցությունն ազդարարող հուշագիրը ստորագրեցին «Ազատություն» համալիրի հիմնադիր-տնօրեն Դավիթ Աթանեսյանը և «Կոնսէլ» ընկերության հիմնադիր-տնօրեն Արման Փափազյանը։
«Ազատություն» համալիրը ստեղծելիս հստակ նպատակ ենք ունեցել՝ Հայաստանում ձևավորել որակի, ճարտարապետության և ժամանակակից քաղաքային միջավայրի նոր նշաձող։ Մեզ համար ի սկզբանե կարևոր էր, որ սա լինի ոչ թե պարզապես հերթական կառուցապատում, այլ նախագիծ, որն իր որակով և փիլիսոփայությամբ առանձնանալու է Հայաստանում իրականացվող մյուս նախագծերից։ Հենց այդ պատճառով էլ յուրաքանչյուր գործընկերոջ ընտրությանը մոտեցել ենք մեծ պատասխանատվությամբ։ Ուրախ ենք, որ այսօր մեր գործընկերների շարքին պաշտոնապես միանում են Mitsubishi Electric-ը և Հայաստանում նրա պաշտոնական ներկայացուցիչ «Կոնսէլ» ընկերությունը»,-նշել է Դավիթ Աթանեսյանը։
Արման Փափազյանի խոսքով՝ այս համագործակցությամբ «Ազատություն» համալիրը և «Կոնսէլ»-ը ևս մեկ անգամ վերահաստատում են իրենց մոտեցումը՝ միավորել միջազգային փորձը, ժամանակակից ճարտարապետությունն ու առաջատար տեխնոլոգիաները մեկ ամբողջական միջավայրում։
«Ուրախ ենք և հպարտ, որ մասնակցում ենք այս կարևոր նախագծի իրականացմանը։ «Ազատություն» համալիրում Mitsubishi Electric-ի ընտրությունը լիովին համապատասխանում է նախագծի ընդհանուր կոնցեպտին՝ ստեղծել ժամանակակից, խելացի և երկարաժամկետ արժեք ձևավորող միջավայր։ Իսկ «Կոնսէլ»-ի բազմամյա փորձն ու ինժեներական ներուժը հնարավորություն են տալիս այդ տեխնոլոգիական լուծումները ներդնել բարձր ճշգրտությամբ, համակարգային մոտեցմամբ և միջազգային ինժեներական չափանիշներին համապատասխան»,- իր ելույթում նշել է Արման Փափազյանը։
Միջոցառումը համախմբել էր դիվանագիտական կորպուսի ներկայացուցիչների, գործընկերների, ներդրողների և ոլորտի առաջատար մասնագետների՝ նշանավորելու համագործակցություն, որը նպատակ ունի նոր նշաձող սահմանել Հայաստանի պրեմիում դասի բնակարանաշինության և ինժեներական լուծումների ոլորտում։
Երեկոյի ընթացքում հյուրերին ներկայացվեց «Ազատություն» պրեմիում դասի բազմաֆունկցիոնալ համալիրը՝ իր բնակելի, առևտրային և ժամանցային հատվածներով, ժամանակակից ճարտարապետական լուծումներով և բարձրակարգ ենթակառուցվածքներով։ Նախագիծը կառուցվում է Երևանի կարևորագույն քաղաքային առանցքներից մեկում՝ Ազատության պողոտայում, որտեղից սկսվում և շարունակվում է քաղաքը։
Միջոցառումն ուղեկցվեց Midnight Avenue Jazz Band-ի կենդանի կատարումներով և հատուկ երեկոյի համար ստեղծված հեղինակային կոկտեյլի հյուրասիրությամբ՝ ստեղծելով ջերմ և յուրահատուկ մթնոլորտ հյուրերի համար։