2 րոպեի ընթերցում
Գեղարքունիքի մարզի Վարդենիս քաղաքի թիվ 1 մարզադպրոցում կայացել է դպրոցական աղջիկների մինի ֆուտբոլի բաց առաջնություն, որը կազմակերպել է Հայաստանի ֆուտբոլի ֆեդերացիայի Գեղարքունիքի մարզի ներկայացուցիչ Վարդան Դավթյանը։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից, Մրցաշարին ներկա են եղել «Հայաստանի Աղջիկների Առաջնորդությունը Սպորտում» կրթական հիմնադրամի ներկայացուցիչները։
Առաջնությանը մասնակցել են Գեղամասարի, Սոթքի, Փոքր Մասրիկի և Ծակքարի միջնակարգ դպրոցների հավաքական թիմերը։
Մրցաշարի վերջնական արդյունքներով առաջին տեղը գրավել է Գեղամասարի միջնակարգ դպրոցի թիմը։ Երկրորդ տեղը գրավել է Սոթքի միջնակարգ դպրոցի թիմը, 3-րդ տեղը՝ Ծակքարի միջնակարգ դպրոցի թիմը։
Լավագույն ֆուտբոլիստուհիներ են ճանաչվել Սոթքի միջնակարգ դպրոցի աշակերտ Միլենա Ավետյանը, Ծակքարի միջնակարգ դպրոցի աշակերտ Մերի Ղուկասյանը
և Գեղամասարի միջնակարգ դպրոցի աշակերտ Միլենա Հարությունյանը։
Մասնակից թիմերին շնորհավորանքի և շնորհակալական խոսքով ողջունել է Վարդենիսի համայնքապետարանի աշխատակազմի կրթության, մշակույթի, սպորտի, երիտասարդության և սոցիալական աջակցության բաժնի պետ Աննա Վարդանյանը:
Խոսրով Խլղաթյան