Աստղաձորի փողոցներում լուսավորության արտաքին ցանց է կառուցվում

Գեղարքունիքի մարզի Մարտունի համայնքի Աստղաձոր գյուղում ՀՀ կառավարության կողմից իրականացվող սուբվենցիոն ծրագրերի շրջանակներում ընթանում են արտաքին լուսավորության ցանցի կառուցման աշխատանքներ։

Ինչպես «Արմենպրես»-ին տեղեկացրին Մարտունիի համայնքապետարանի աշխատակազմից, Աստղաձորի 10 փողոցի արտաքին լուսավորության ցանցի կառուցման ծրագրի պայմանագրային արժեքը կազմում է 21 միլիոն դրամ, որի 60 տոկոսը հատկացնում է ՀՀ կառավարությունը, 40 տոկոսը՝ Մարտունիի համայնքապետարանը։

Ծրագրով նախատեսված է արտաքին լուսավորության ցանցի կառուցում Աստղաձորի 2, 6, 21, 33, 36, 43, 46, 47, 48 և 70-րդ փողոցներում՝ 4400 գծամետր երկարությամբ, ԼԵԴ համակարգով աշխատող շուրջ 150 լուսատուի տեղադրմամբ։

Շինարարական աշխատանքներն արդեն իրականացվել շուրջ 60 տոկոսով։ Ծրագիրը նախատեսված է ավարտել առաջիկա երկու ամսվա ընթացքում։

Ծրագրի իրականացման արդյունքում վերոնշյալ փողոցների բնակիչներն առաջին անգամ արտաքին լուսավորության ցանցից օգտվելու հնարավորություն կունենան։