Գարեգին Բ կաթողիկոսի նախագահությամբ Ծիծեռնակաբերդի հուշահամալիրում կատարվել է բարեխոսական կարգ
2 րոպեի ընթերցում
Գարեգին Բ կաթողիկոսը՝ Մայր Աթոռ Սուրբ Էջմիածնի միաբանների ուղեկցությամբ, ապրիլի 24-ին այցելել է Ծիծեռնակաբերդի հուշահամալիր՝ մասնակցելու Հայոց ցեղասպանության սուրբ նահատակների հիշատակի ոգեկոչման արարողություններին։
«Արմենպրես»-ի հաղորդմամբ՝ Գարեգին Բ կաթողիկոսը ծաղկեպսակ է զետեղել հուշահամալիրում, որից հետո անմար կրակի առջև նրա նախագահությամբ կատարվել է Հայոց ցեղասպանության սուրբ նահատակների բարեխոսական կարգ։
Մայր Աթոռ Սուրբ Էջմիածնի տեղեկատվական համակարգը հրապարակել է նաև Ամենայն Հայոց կաթողիկոսի ուղերձը Հայոց ցեղասպանության 111-րդ տարելիցի կապակցությամբ։
«Այսօր Հայաստանում և սփյուռքի համայնքներում ոգեկոչում ենք Օսմանյան կայսրությունում իրականացված Հայոց ցեղասպանության մեր սուրբ նահատակների հիշատակը, ովքեր անմահացան՝ իրենց հոգիներում անմար պահելով սերն առ Քրիստոս և առ հայրենին։
Ապրիլի 24-ը խորհրդանշորեն ամփոփում է մեր ժողովրդի հավաքական տառապանքը, որի մեջ խտացված են մեկ և կես միլիոն մարտիրոսացյալ հայորդիների, հայրենակորույս, տարագիր ազգիս զավակների, մշակութային եղեռնի ենթարկված մեր վանքերի ու եկեղեցիների, ավիրված բնակավայրերի հիշողությունները։ Այդ ողբերգությունը, սակայն, չկոտրեց մեր ազգի ոգին։ Մեր ժողովուրդը վերապրեց ցեղասպանությունը, ամենուր նոր կյանք վերընձյուղեց, վերահաստատեց հայոց անկախ պետականությունը։
Ապրիլի 24-ն ուխտի օր է՝ միահյուսված աշխարհասփյուռ մեր ժողովրդի պահանջատիրությանը, որը զերծ է թշնամանքից ու ատելությունից, ուղղված է արդարության ու ճշմարտության վերականգնմանը և ցեղասպանության արհավիրքի ուրացման բացառմանը»,- ուղերձում նշել է Գարեգին Բ կաթողիկոսը։