«Լուսավոր Հայաստան» կուսակցությունը ԿԸՀ է ներկայացրել առաջիկա ընտրություններին մասնակցելու փաստաթղթերը
2 րոպեի ընթերցում
«Լուսավոր Հայաստան» կուսակցությունը հունիսի 7-ին կայանալիք խորհրդարանական ընտրություններին մասնակցելու համար փաստաթղթերը ներկայացրել է Կենտրոնական ընտրական հանձնաժողով։
«Արմենպրես»-ի հաղորդմամբ՝ համապատասխան փաստաթղթերը ԿԸՀ է ներկայացրել «Լուսավոր Հայաստան» կուսակցության կառավարման խորհրդի անդամ Դավիթ Խաժակյանը։
Փաստաթղթերը հանձնելուց հետո լրագրողների հետ զրույցում Դավիթ Խաժակյանն անդրադարձավ հարցին, թե առաջիկա ընտրություններում ի՞նչ շանսեր ունի «Լուսավոր Հայաստան» կուսակցությունը։
«Շանսերը գնահատողը լինելու է մեր քաղաքացին, որն արվել է մինչև այս օրը, իսկ մեր կուսակցությունը շատ ակտիվ ներգրավվածություն է ունեցել հանրային քաղաքական կյանքում։ Ես կարծում եմ, որ սա գնահատանքի արժանի է լինելու»,- ասել է Խաժակյանը։
Խաժակյանը նաև մեկնաբանել է, թե ինչու ինքը ներառված չէ կուսակցության նախընտրական ցուցակում։
Խաժակյանը պարզաբանել է, որ դա եղել է իր որոշումը, որը քննարկել է քաղաքական թիմի հետ, և եկել են եզրահանգման, որ ինքը նախընտրական շրջանում լինելու է ԿԸՀ-ում «Լուսավոր Հայաստան»-ի լիազոր ներկայացուցիչը։
«Լուսավոր Հայաստան» կուսակցության նախընտրական ցուցակի առաջին հնգյակում են Էդմոն Մարուքյանը, Կարպիս Փաշոյանը, Շուշան Ավագյանը, Գևորգ Գորգիսյանը և Սուրեն Գյուրջինյանը։
Կուսակցությունը վարչապետի թեկնածու չունի, փոխարենը հայտարարել են, որ նախագահի պաշտոնում կառաջադրեն Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի թեկնածությունը, քանի որ միայն նրա անձի շուրջ է հնարավոր ընդդիմության համախմբում։