Չինաստանը կպատասխանի Իրանին աջակցության պատրվակով իր նկատմամբ սահմանվող ամերիկյան մաքսատուրքերին
1 րոպեի ընթերցում
Չինաստանի իշխանությունները վճռական միջոցներ կձեռնարկեն, եթե Միացյալ Նահանգներն Իրանին ռազմական աջակցություն ցույց տալու պատրվակով մաքսատուրքեր սահմանի Չինաստանից ներմուծվող ապրանքների նկատմամբ: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Չինաստանի արտաքին գործերի նախարարության պաշտոնական ներկայացուցիչ Գո Ցզյակունը։
«Մենք ցանկանում ենք մեկ անգամ ևս ընդգծել, որ ՉԺՀ-ն միշտ զգուշավոր և պատասխանատու դիրքորոշում է պահպանում ռազմական արտադրանքի արտահանման հարցերում, - ասել է նա ճեպազրույցի ժամանակ՝ մեկնաբանելով Վաշինգտոնի սպառնալիքը` սահմանելու մաքսատուրքեր Իրանին օգնության համար։ - Եթե ամերիկյան կողմը ցանկանում է դա որպես պատրվակ օգտագործել Չինաստանի նկատմամբ լրացուցիչ մաքսատուրքեր սահմանելու համար, ապա մենք անպայման կձեռնարկենք վճռական պատասխան միջոցներ»:
Ավելի վաղ ԱՄՆ նախագահ Դոնալդ Թրամփը սպառնացել էր 50% մաքսատուրքեր սահմանել Չինաստանի նկատմամբ այն բանից հետո, երբ տեղեկություններ էին տարածվել, թե Պեկինը պատրաստվում է հակաօդային պաշտպանության համակարգեր մատակարարել Իրանին։