ՎԶԵԲ-ը ընդհանուր 5 մլրդ եվրո ներդրումներ է նախատեսում Մերձավոր Արևելքում հակամարտությունից տնտեսապես տուժած երկրներում, այդ թվում՝ Հայաստանում
2 րոպեի ընթերցում
Վերակառուցման և զարգացման եվրոպական բանկը (ՎԶԵԲ/EBRD) նախատեսում է 2026 թվականին ընդհանուր առմամբ շուրջ 5 միլիարդ եվրոյի ներդրումներ ուղղել այն տնտեսություններին, որոնք տուժել են Մերձավոր Արևելքի հակամարտությունից։ Երկրների թվում է նաև Հայաստանը։ «Արմենպրես»-ի հաղորդմամբ՝ բանկի հայտարարության համաձայն՝ Հայաստանը ներառված է այն երկրների շարքում, որոնք անմիջականորեն չեն հանդիսանում հակամարտության կողմ, սակայն ենթարկվում են դրա տնտեսական ազդեցությանը՝ որպես տարածաշրջանային շղթայի մաս։
Նշվում է, որ հակամարտության հետևանքները արտահայտվում են առևտրային ուղիների խափանումներով, էներգետիկ և հումքային շոկերով, ներդրումային վստահության նվազմամբ և սոցիալ-տնտեսական ճնշումների աճով։
ՎԶԵԲ-ը հայտարարել է, որ հակամարտության արձագանքման իր ծրագիրը կներառի ֆինանսական հաստատությունների աջակցություն, մասնավոր հատվածի կայունության ապահովում և ենթակառուցվածքների զարգացում, ինչից կարող է օգտվել նաև Հայաստանը։
Բանկի նախագահ Օդիլ Ռենո-Բասսոն ընդգծել է, որ ՎԶԵԲ-ը պատրաստ է ակտիվացնել իր ներգրավվածությունը նման իրավիճակներում։
«Անորոշության աճի պայմաններում մենք ուժեղացնում ենք մեր ներգրավվածությունը՝ պահպանելով առողջ բանկային հիմունքները։ Մենք այստեղ ենք՝ աջակցելու մեր գործընկեր երկրների տնտեսություններին, հաճախորդներին և մարդկանց դժվար ժամանակներում»,- նշել է նա։
Ծրագրի շրջանակում նախատեսվում է նաև ուժեղացնել էներգետիկ անվտանգությունը, աջակցել բիզնեսին՝ շուկայի տատանումներին դիմակայելու համար, ինչպես նաև ներդրումներ կատարել ենթակառուցվածքներում և թվային լուծումներում։
ՎԶԵԲ-ը շեշտում է, որ աջակցությունը կուղղվի նաև աշխատատեղերի պահպանմանը, ֆինանսական հասանելիության ընդլայնմանը և խոցելի խմբերի պաշտպանությանը։
Բանկը հավելել է, որ ներդրումների ծավալը կլինի պահանջարկով պայմանավորված՝ հաշվի առնելով իրավիճակի արագ փոփոխվող բնույթը։
ՎԶԵԲ-ը նախատեսում է իր ծրագրերը իրականացնել նաև միջազգային գործընկերների հետ համագործակցությամբ՝ ապահովելու տնտեսությունների դիմակայունությունն ու կայուն զարգացումը։