2 րոպեի ընթերցում
Իրանում ԱՄՆ-ի և Իսրայելի հարվածներից վնասվել է պատմամշակութային ժառանգության 131 օբյեկտ, այդ թվում՝ համաշխարհային նշանակության վայրեր: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է Իրանի մշակույթի նախարարությունը։
«Վնասված պատմական օբյեկտների թիվը, որը կազմում էր 114, ավելացել է մինչև 131: Դրանք համաշխարհային, ազգային և տարածաշրջանային նշանակության օբյեկտներ են: Դա վկայում է վնասի աճող մասշտաբների և անհապաղ միջամտության ու մարդկության ընդհանուր մշակութային ժառանգության պահպանման նկատմամբ միջազգային հանրության ուշադրության անհրաժեշտության մասին», - մեջբերում է հայտարարության տեքստից Իրանի կառավարության մամուլի ծառայությունը։
Գերատեսչությունը հավելել է, որ Իրանում վնասվել է 64 զբոսաշրջային օբյեկտ, ներառյալ հյուրանոցներ, կենցաղային սպասարկման համալիրներ, զբոսաշրջային գործակալություններ և հասարակական սննդի ձեռնարկություններ 10 նահանգում:
Մշակույթի նախարարությունը նաև հայտարարել է, որ վնասվել է 50 թանգարան, այդ թվում՝ Սաադաբադի պալատական համալիրի 14 թանգարան և յոթ թանգարան, որոնք մտնում են Գոլեստանի պալատական համալիրի կազմի մեջ։
Գոլեստանը Թեհրանի ամենահին պալատական համալիրներից մեկն է: Այն եղել է 18-րդ դարի վերջին Իրանում իշխանության եկած Ղաջարների արքայատոհմի շահերի գահանիստ վայրը: 2013 թվականից այն ներառված է ՅՈՒՆԵՍԿՕ-ի համաշխարհային ժառանգության ցանկում: