2 րոպեի ընթերցում
Հայաստանի ֆուտբոլի ազգային թիմի գլխավոր մարզիչ Եղիշե Մելիքյանը Բելառուսի ազգային թիմի հետ ընկերական խաղում հիմնականում փորձարկումներ կանի:
«Արմենպրես»-ի հաղորդմամբ`Մելիքյանն այդ մասին ասաց լրագրողների հետ նախախաղային մամուլի ասուլիսի ընթացքում։
«Ընկերական խաղերի համար մրցակիցներին ես եմ ընտրել: Մենք պետք է աշխատենք, որ հաղթենք՝ այդպիսով ոգևորելով մեր երկրպագուներին, որ գան մարզադաշտ»,-ասաց նա:
Խոսելով հավաքական հրավիրված 6 նորեկների մասին` Մելիքյանն ընդգծեց, որ նրանք իրենց հետ մեծ փոփոխություններ կբերեն ազգային թիմին:
«Ընդհանուր կարող եմ ասել, որ ազգային հավաքականում մեծ փոփոխություններ են, այդպես ստացվեց։ Կային ֆուտբոլիստներ, որ ժամանակն էր, որ նրանք գնային ազգային հավաքականից, և կան ֆուտբոլիստներ, որոնց հավաքական գալու ժամանակն է։ Մենք այդ փուլում ենք, դրա համար պետք է լավատես լինել, համբերատար լինել և աշխատել»,- նշեց Մելիքյանը։
Մելիքյանը դեռևս վստահ չէ՝ Էդուարդ Սպերցյանը կմասնակցի՞ առաջիկա ընկերական խաղին, թե՞ ոչ: Ավելի վաղ մամուլում լուրեր էին տարածվել, որ Էդուարդ Սպերցյանը թեթև վնասվածք է ստացել, և այժմ քննարկվում է հարցը, թե արդյոք նա կմնա՞ հավաքականի ճամբարում, թե՞ կլքի այն։
Անդրադառնալով օրեր առաջ տարբեր տարիքային հավաքականների մարզիչների հետ հանդիպմանը՝ Մելիքյանն ասաց, որ այդ հանդիպումները շարունակական են լինելու, և միասնական աշխատանքը չի դադարելու:
Հայաստան-Բելառուս ընկերական հանդիպումը կկայանա մարտի 29-ին, Երևանի Հանրապետական մարզադաշտում: Խաղը կմեկնարկի ժամը 18:00-ին: