ՀՀ դեսպանն ու ԱՄՆ Դաշնային հաղորդակցությունների հանձնաժողովի նախագահը քննարկել են հաղորդակցության ոլորտում համագործակցության հարցեր
1 րոպեի ընթերցում
Միացյալ Նահանգներում Հայաստանի Հանրապետության դեսպան Նարեկ Մկրտչյանը հանդիպել է ԱՄՆ Դաշնային հաղորդակցությունների հանձնաժողովի (FCC) նախագահ Բրենդան Քարի հետ:
«Արմենպրես»-ի հաղորդմամբ՝ այս մասին հայտնում են ԱՄՆ-ում ՀՀ դեսպանությունից՝ ներկայացնելով հանդիպման մանրամասները։
Նշվում է, որ հանդիպման ընթացքում քննարկվել են հաղորդակցության և անվտանգության ոլորտի մի շարք առաջնահերթություններ՝ հիբրիդային սպառնալիքների, ապատեղեկատվության դեմ պայքարի և այլնի համատեքստում։
«Դեսպան Մկրտչյանը կարևորել է FCC-ի ունեցած փորձն ու ընդգծել համագործակցության անհրաժեշտությունը՝ հաշվի առնելով այս ոլորտում Հայաստանի ունեցած ներուժը, ենթակառուցվածքների և տեխնոլոգիական զարգացման գործընթացում սահմանված առաջնահերթությունները»,-ասված է դեսպանության տարածած հաղորդագրության մեջ:
Հանդիպմանը դիտարկվել են հաղորդակցության ոլորտում լավագույն փորձի փոխանակման, ոլորտային փոխայցերի իրականացման և համագործակցության ինստիտուցիոնալացման հնարավորությունները։