Կուբան լիովին հոսանքազրկվել է

Կուբայում տեղի է ունեցել էլեկտրաէներգիայի լիակատար անջատում: «Արմենպրես»-ի փոխանցմամբ՝ այս մասին մարտի 16-ին հաղորդել է ​​էլեկտրացանցերի պետական օպերատորը՝ UNE-ն։ Այսպիսով, կղզու ողջ բնակչությունը՝ շուրջ 10 միլիոն մարդ, մնացել է առանց էլեկտրականության։

«Ներկայում միջոցներ են ձեռնարկվում էլեկտրամատակարարումը վերականգնելու համար», - X-ում հայտնել է UNE ընկերությունը։

Իր հերթին, Reuters գործակալությունը հիշեցնում է, որ Կուբայում ներկայիս էլեկտրաէներգիայի անջատմանը նախորդել էին էլեկտրաէներգիայի մի շարք անջատումներ։ Առանձին դեպքերում կուբացիները մի քանի օր մնացել են առանց էլեկտրաէներգիայի։

Այս ֆոնին հանգստյան օրերին՝ մարտի 14-ին և 15-ին, երկրում անցկացվել են բողոքի ցույցեր, որոնք մի քանի վայրում վերածվել են փողոցային անկարգությունների։

Կուբայում տնտեսական և էներգետիկ ճգնաժամը զգալիորեն խորացել է ԱՄՆ-ի կողմից նավթային շրջափակման պատճառով: Մինչև վերջին ժամանակներս Վենեսուելան Կուբային նավթի հիմնական մատակարարն էր: Սակայն այս տարվա հունվարին Վենեսուելայում ԱՄՆ հատուկ գործողությունից և երկրի ղեկավար Նիկոլաս Մադուրոյի ձերբակալությունից հետո Կարակասը դադարեցրել է նավթի մատակարարումները կուբացիներին:

Բացի այդ, Վաշինգտոնը սպառնացել է բարձր մաքսատուրքեր սահմանել այն երկրների նկատմամբ, որոնք կսկսեն նավթ վաճառել Կուբային: ԱՄՆ նախագահ Դոնալդ Թրամփը նաև հայտարարել է, որ Կուբան հաջորդը կլինի իր օրակարգում Իրանի հետ պատերազմից հետո: