Պենտագոնը օրենսդիրներին հայտնել է Իրանի դեմ պատերազմի առաջին շաբաթում մոտ 11.3 մլրդ դոլար ծախսելու մասին
2 րոպեի ընթերցում
ԱՄՆ Պենտագոնի ներկայացուցիչները Կոնգրեսի անդամներին հայտնել են, որ Իրանի դեմ Միացյալ Նահանգների պատերազմն առաջին շաբաթում մոտավորապես արժեցել է մոտ 11.3 միլիարդ դոլար։ Ինչպես The Hill պարբերականին հայտնել է թեմայից տեղյակ աղբյուրը, այս թիվը սենատորներին հայտնել են փակ հանդիպման ժամանակ։
Ինչպես հաղորդում է «Արմենպրես»-ը՝ վկայակոչելով CBS News-ը, այս թիվը նվազագույն հաշվարկն է և չի ներառում մինչև փետրվարի 28-ին գործողությունների մեկնարկը ակտիվները տարածաշրջանում տեղակայելու ծախսերը։
Սենատի պաշտպանական հատկացումները կարգավորող ենթահանձնաժողովի դեմոկրատ սենատոր Քրիս Քունսը մարտի 11-ին լրագրողներին ասել է, որ իր կարծիքով գումարը շատ ավելի մեծ է։ Նրա խոսքով՝ «արդարացի ենթադրություն» կլինի, որ պատերազմի օրական արժեքը գերազանցում է 1.5 միլիարդ դոլարը։ Սենատորի համոզմամբ՝ պատերազմում օգտագործված զինամթերքի փոխարինման արժեքը, հավանաբար, «արդեն գերազանցում է 10 միլիարդ դոլարը»։
Օրենսդիրը կարծիք է հայտնել, որ Պենտագոնը կխնդրի օրենսդիրներին ընդունել Իրանի պատերազմի համար լրացուցիչ ֆինանսավորման փաթեթ։
The Hill պարբերականը գրում է, որ Պենտագոնը հրաժարվել է մեկնաբանել տեղեկությունը։ Կառույցի մամուլի խոսնակը նշել է, որ գերատեսչությունը չի իմանա Իրանի դեմ գործողության արժեքը, «քանի դեռ առաքելությունը չի ավարտվել»։