ԱՄՆ զինվորական հետաքննիչները ենթադրում են, որ Իրանում տարրական դպրոցին հարվածը հասցրել են ամերիկացի զինվորականները. Reuters
2 րոպեի ընթերցում
ԱՄՆ զինվորական հետաքննիչները կարծում են, որ հարվածը Իրանի Մինաբ քաղաքում գտնվող օրիորդաց դպրոցին, ամենայն հավանականությամբ, հասցրել է ԱՄՆ-ն: «Արմենպրես»-ի փոխանցմամբ՝ այս մասին գրում է Reuters-ը՝ հղում անելով երկու աղբյուրի։
Գործակալության զրուցակիցները նշել են, որ սա վերջնական եզրակացությունը չէ. հետաքննությունը շարունակվում է։
Reuters-ին չի հաջողվել պարզել, թե ինչ տվյալների հիման վրա են հետաքննիչներն այս եզրակացությանը հանգել, ինչպես նաև հայտնի չէ, թե դեռ որքան ժամանակ կարող է տևել հետաքննությունը։
Մարտի 4-ին Պենտագոնի ղեկավար Փիթ Հեգսեթը հայտնել էր, որ ԱՄՆ զինվորականները հետաքննում են միջադեպը։ Նա հավելել էր, որ ԱՄՆ-ն քաղաքացիական օբյեկտներ չի թիրախավորում։
The New York Times-ը վերլուծել է արբանյակային լուսանկարներն ու այլ նյութեր և եկել այն եզրակացության, որ հարվածը դպրոցին հասցվել է այն պահին, երբ գրոհ է իրականացվել Իսլամական հեղափոխության պահապանների կորպուսի մոտակա բազաների վրա։
Իր հերթին, BBC Verify-ը (BBC-ի փաստերի ստուգման բաժին) հայտնել է, որ զինամթերքի բեկորների լրացուցիչ լուսանկարների բացակայության պատճառով անհնար է վստահորեն ասել, թե ով է կանգնած գրոհի հետևում։
Մինաբում օրիորդաց դպրոցին հարվածը հասցվել է ԱՄՆ-ի և Իսրայելի կողմից Իրանում ռազմական գործողությունների առաջին օրվա՝ փետրվարի 28-ի առավոտյան։ Իրանի իշխանությունները հայտնում են 168 զոհի մասին։
Կողմերից ոչ մեկը պատասխանատվություն չի ստանձնել հարվածի համար։