Շուրջ 500 դպրոց մասնակցել է «Երգենք ու պարենք մայրենիով» խորագրով հեղինակային տեսանյութերի մրցույթին
2 րոպեի ընթերցում
Ամփոփվել է Մայրենի լեզվի միջազգային օրվա կապակցությամբ ՀՀ կրթության, գիտության, մշակույթի և սպորտի նախարարության և Լեզվի կոմիտեի կազմակերպած «Երգենք ու պարենք մայրենիով» խորագրով հեղինակային տեսանյութերի մրցույթը, որին մասնակցել է շուրջ 500 հանրակրթական դպրոց:
Ինչպես «Արմենպրես»-ը տեղեկանում է ԿԳՄՍ նախարարության տարածած հաղորդագրությունից, մրցույթն անցկացվել է 2026 թ. փետրվարի 13-20-ը ներառյալ: Համաձայն մրցութային կանոնների՝ յուրաքանչյուր դպրոց կարող էր ներկայացնել մինչև 1 րոպե տևողությամբ մեկ տեսանյութ, որում կներկայացվեր ազգային երգ ու պարի բեմականացում՝ կիրառելով նորարար և ստեղծագործ մոտեցումներ: Դպրոցները պետք է ուղարկեին իրենց սոցիալական հարթակներում հրապարակած տեսանյութերը՝ #երգենքուպարենքմայրենիով նշիչով:
Ուսումնական հաստատություններից ուղարկվել է շուրջ 500 տեսանյութ, որոնցից դիտարկվել է սահմանված չափանիշներին համապատասխանող 190-ը: ԿԳՄՍ նախարարի հրամանով ձևավորված մրցութային հանձնաժողովն ընտրել է լավագույն 10 տեսանյութերը:
Հացթող դպրոցներն են՝
- ՀՀ Սյունիքի մարզի Գորիսի Յու. Բախշյանի անվան թիվ 3 հիմնական դպրոց
- Երևանի «Մխիթար Սեբաստացի» կրթահամալիր
- ՀՀ Տավուշի մարզի Գետահովիտի միջնակարգ դպրոց
- Երևանի Ստեփան Զորյանի անվան թիվ 56 հիմնական դպրոց
- Երևանի Պեյո Յավորովի անվան թիվ 131 հիմնական դպրոց
- Երևանի Ալեքսանդր Քեմուրջյանի անվան 170 ավագ դպրոց
- Երևանի Գևորգ Վարդանյանի անվան թիվ 192 հիմնական դպրոց
- ՀՀ Սյունիքի մարզի Մեղրու թիվ 2 միջնակարգ դպրոց
- Երևանի լսողության խանգարումներ ունեցող երեխաների հատուկ կրթահամալիր /ԼԽՈՒԵ/
- ՀՀ Արարատի մարզի Արարատ գյուղի թիվ 2 միջնակարգ դպրոց:
Հաղթող դպրոցները կպարգևատրվեն ԿԳՄՍՆ շնորհակալագրով ու խրախուսական նվերներով: