Ժնևում մեկնարկել են ԱՄՆ-Ուկրաինա բանակցությունները

Ուկրաինայի ազգային անվտանգության և պաշտպանության խորհրդի քարտուղար, ուկրաինական կողմի գլխավոր բանակցող Ռուստեմ Ումերովը հայտնել է, որ Շվեյցարիայի Ժնև քաղաքում մեկնարկել են ուկրաինական և ամերիկյան պատվիրակությունների միջև բանակցությունները։ «Արմենպրես»-ի փոխանցմամբ՝ այս մասին Ումերովը հայտնել է X հարթակում գրառման մեջ։

«Այսօր Ժնևում շարունակում ենք մեր աշխատանքը բանակցային գործընթացի շրջանակներում։ Սկսվել է ամերիկյան պատվիրակության հետ երկկողմ հանդիպումը՝ Սթիվ Ուիթքոֆի և Ջարեդ Քուշների հետ», - գրել է Ումերովը։

Նրա խոսքով՝ ուկրաինական կողմից պատվիրակության կազմում են նաև «Ժողովրդի ծառա» խմբակցության ղեկավար Դավիթ Արախամիան, էկոնոմիկայի նախարար Ալեքսեյ Սոբոլևը և սոցիալական քաղաքականության նախարարի առաջին տեղակալ Դարյա Մարչակը։

«Կառավարության տնտեսական թիմի հետ միասին մենք մանրակրկիտ կաշխատենք բարգավաճման փաթեթի վրա՝ Ուկրաինայի տնտեսական աջակցության և վերականգնման մեխանիզմներ, ներդրումների ներգրավման գործիքներ և երկարաժամկետ համագործակցության շրջանակներ։ Բացի այդ, Դավիդի հետ միասին մենք կքննարկենք ռուսական կողմի մասնակցությամբ եռակողմ բանակցությունների հաջորդ փուլի նախապատրաստական ​​աշխատանքները. անհրաժեշտ է համաձայնեցնել դիրքորոշումներն այս փուլից առաջ», - նշել է նա։

Ումերով կարևորել է մարդասիրական ուղղությունը և հնարավոր փոխանակումների հարցը։

«Մենք ակնկալում ենք կոնկրետ արդյունքներ մեր քաղաքացիների վերադարձի վերաբերյալ։ Մենք կենտրոնացած ենք գործնական լուծումների վրա։ Արդյունքների մասին կտեղեկացնենք հանդիպման ավարտից հետո», - եզրափակել է նա։

CNN-ի փոխանցմամբ՝ ռուս-ուկրաինական բանակցությունները մեկնարկել են այն բանից հետո, երբ ընդմիջվել են ԱՄՆ-ի և Իրանի միջև անուղղակի բանակցությունները։ Հեռուստաալիքի նկարահանող խումբը արձանագրել է, թե ինչպես է ԱՄՆ պատվիրակությունը դուրս գալիս Ժնևում Օմանի դեսպանի կեցավայրից։

Փետրվարի 17-18-ը Շվեյցարիայի Ժնև քաղաքում տեղի է ունեցել Ուկրաինայի, ԱՄՆ-ի և Ռուսաստանի միջև եռակողմ բանակցությունների երրորդ փուլը։ Հաջորդ եռակողմ հանդիպումը նախատեսվում է մարտի սկզբին։