Մեքսիկան ևս 2500 զինվորական է տեղակայել Խալիսկոյում՝ «Էլ Մենչոյի» սպանությունից հետո խռովությունները զսպելու համար
2 րոպեի ընթերցում
Մեքսիկան լրացուցիչ 2500 զինվորական է տեղակայել երկրի արևմուտքում՝ Խալիսկոյի նահանգում, թմրակարտելի պարագլուխ Նեմեսիո Օսեգերա Սերվանտեսի՝ «Էլ Մենչոյի» սպանությունից հետո սկսված անկարգությունները զսպելու համար։ «Արմենպրես»-ի փոխանցմամբ՝ այս մասին հաղորդում է BBC-ն՝ վկայակոչելով պաշտպանության նախարար Ռիկարդո Տրևիյային։
Վերջին երկու օրում տեղակայված զինծառայողների ընդհանուր թիվը հասել է 9500-ի։ «Էլ Մենչոն» սպանվել է Խալիսկոյի նահանգի Տապալպա քաղաքում փետրվարի 23-ին՝ անվտանգության ուժերի հետ բախումների ընթացքում ստացած վերքերից։
«Խալիսկոյի նոր սերնդի կարտել»-ը, որը նա գլխավորում էր, Մեքսիկայի ամենաահարկու քրեական կազմակերպություններից մեկն է։ «Էլ Մենչոյի» մահվան լուրի տարածումից հետո նրա թմրակարտելի անդամները հարձակումներ են իրականացրել առնվազն 20 նահանգում։ Խալիսկոյի նահանգում փետրվարի 22-ից սկիզբ առած բախումների ընթացքում Մեքսիկայի ազգային գվարդիայի առնվազն 25 զինծառայող է զոհվել։
Ըստ Տրևիյայի՝ անվտանգության ուժերը «Էլ Մենչոյի» գտնվելու վայրն իմացել են՝ հետևելով նրա ընկերուհուն, որի հետ նա այդ պահին հանդիպման էր։ Գործողության ընթացքում զոհվել էին նրա թիկնապահներից 6-ը, 3 զինծառայող վիրավորվել էր։ «Էլ Մենչոն» մահացել է ուղղաթիռով հիվանդանոց տեղափոխվելու ճանապարհին։
«Էլ Մենչոյի» քրեական կազմակերպության ևս 30 անդամ զոհվել է նրա մահվանից հետո տեղի ունեցած բախումների ընթացքում։
Թմրակարտելի անդամները հրկիզել են տասնյակ բանկեր և բիզնեսներ։ Իշխանությունները մարդկանց հորդորել են տնից դուրս չգալ։
ԱՄՆ-ն աջակցել է Մեքսիկայի իշխանություններին՝ հետախուզական տվյալներ տրամադրելով։ ԱՄՆ պետքարտուղարությունն ավելի վաղ 15 միլիոն դոլար էր առաջարկել «Էլ Մենչոյի» ձերբակալությանը հանգեցնող տեղեկատվության համար։