2 րոպեի ընթերցում
Գեղարքունիքի մարզի Մարտունի համայնքը մի քանի օր է, ինչ անցել է կենտրոնացված աղբահանության, որն իրականացվում է «Կոտայքի և Գեղարքունիքի Կենցաղային կոշտ թափոնների կառավարման կենտրոն»-ի կողմից։
Ինչպես «Արմենպրես»-ի թղթակցին տեղեկացրեց «Կոտայքի և Գեղարքունիքի Կենցաղային կոշտ թափոնների կառավարման կենտրոն»-ի տնօրեն Սերգեյ Համբարձումյանը, Մարտունի քաղաքում ու համայնքի գյուղական բնակավայրերում իրականացվում են աղբամանների տեղադրման և ծառայության կազմակերպման նախապատրաստական աշխատանքները։ Վերոնշյալ աշխատանքները միտված են ապահովելու համայնքում աղբահանության համակարգված և արդյունավետ իրականացումը։
Ծառայության ներդրմանը նախորդել են համայնքի տարածքների ուսումնասիրությունը և գոտևորումը, սպասարկման սխեմաների մշակումն ու տեխնիկական կազմակերպչական աշխատանքները, անհրաժեշտ ենթակառուցվածքների նախապատրաստումը։
«Փետրվարի 21-ից արդեն սկսել ենք աղբամանների տեղադրման աշխատանքները։ Համայնքի բոլոր բնակավայրերում նախատեսում ենք տեղադրել 1000 աղբաման։ Երկու օրվա ընթացքում տեղադրել ենք շուրջ 100 աղբաման ու նաև կազմակերպել աղբի տեղափոխումը դեպի Հրազդանի սանիտարական աղբավայր։ Առաջիկա երկու շաբաթների ընթացքում աղբամանների տեղադրման գործընթացը կավարտենք բոլոր բնակավայրերում։ Միաժամանակ, աշխատանքներ ենք տանում Մարտունու փոխաբեռնման կայանի գործարկման ուղղությամբ։ Այս պահի դրությամբ կենտրոնացված աղբահանություն իրականացնում ենք Գեղարքունիքի մարզի Գավառ, Սևան, Ճամբարակ ու արդեն Մարտունի համայնքներում, տարվա ընթացքում այս համայքներին միանա նաև Վարդենիսը»,- եզրափակեց Սերգեյ Համբարձումյանը։