368.15
Երևանը և Բաքուն ինքնիշխան են և իրավունք ունեն հարաբերություններ կառուցելու Վաշինգտոնի հետ. Պեսկով
2 րոպեի ընթերցում
Հայաստանն ու Ադրբեջանն ինքնիշխան պետություններ են, հետևաբար, նրանք լիովին իրավունք ունեն հարաբերություններ կառուցելու ցանկացած երկրի, այդ թվում՝ Միացյալ Նահանգների հետ, հայտարարել է Կրեմլի խոսնակ Դմիտրի Պեսկովը՝ մեկնաբանելով ԱՄՆ փոխնախագահ Ջեյ Դի Վենսի այցը Հայաստան և Ադրբեջան։ «Արմենպրես»-ի փոխանցմամբ՝ այս մասին հաղորդում է ՏԱՍՍ-ը
«Նրանք ինքնիշխան պետություններ են, և նրանք ունեն ինքնիշխան իրավունք կառուցելու իրենց հարաբերությունները այլ երկրների հետ», - ընդգծել է ՌԴ նախագահի մամուլի քարտուղարը՝ մեկնաբանելով Վենսի այցի ընթացքում Հայաստանի և Ադրբեջանի հետ ԱՄՆ-ի համատեղ լայնամասշտաբ ծրագրերի մասին հայտարարությունները։
Վենսի այցը Հարավային Կովկաս ավարտվում է այսօր։ Նա Հայաստան էր այցելել փետրվարի 9-10-ին, որից հետո մեկնել է Ադրբեջան։
Հայաստանի վարչապետ Նիկոլ Փաշինյանի հետ ԱՄՆ փոխնախագահ Վենսը ստորագրել է «Միջուկային էներգիայի խաղաղ նպատակներով օգտագործման ոլորտում ՀՀ կառավարության և ԱՄՆ կառավարության միջև համագործակցության մասին համաձայնագրի բանակցությունների ավարտի վերաբերյալ համատեղ հայտարարությունը»։ Վենսը նաև հայտարարել է այն մասին, որ լայն հնարավորություններ են բացվել խոշոր ծրագրերի իրականացման համար, և ամերիկյան տեխնոլոգիաները կգան Հայաստան։ Իսկ Բաքվում նա Միացյալ Նահանգների անունից ստորագրել է Ադրբեջանի հետ ռազմավարական գործընկերության խարտիան։
Բաժանորդագրվեք մեր ալիքին Telegram-ում