Վերաքննիչ դատարանը Միքայել արքեպիսկոպոս Աջապահյանի նկատմամբ տնային կալանք է կիրառել

Վերաքննիչ դատարանը որոշում է կայացրել Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի նկատմամբ կիրառված խափանման միջոցը փոխել՝ կալանքի փոխարեն սահմանելով տնային կալանք։

«Արմենպրես»-ի հաղորդմամբ՝ Երևան քաղաքի ընդհանուր իրավասության դատարանը Միքայել արքեպիսկոպոս Աջապահյանին դատապարտել էր 2 տարվա ազատազրկման։

Նրա նկատմամբ քրեական հետապնդում էր հարուցվել ՀՀ քրեական օրենսգրքի 422-րդ հոդվածի 2-րդ մասով՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի համար։ Արքեպիսկոպոսը կալանավորված էր 2025 թվականի հունիսի 28-ից։

Միքայել արքեպիսկոպոս Աջապահյանը չի ընդունում իրեն առաջադրված մեղադրանքը։

Պաշտպանական կողմը ներկայացրել էր վերաքննիչ բողոք՝ պահանջելով ամբողջությամբ բեկանել դատավճիռը և հռչակել արքեպիսկոպոսի անմեղությունը։ Միքայել արքեպիսկոպոս Աջապահյանը նաև իր իրավունքների պաշտպանության համար դիմել է Մարդու իրավունքների եվրոպական դատարան։