368.59
Գավառ համայնքում տեղի է ունեցել «Մասնակցային բյուջետավորում-2026» գործընթացի առաջարկների նախնական գնահատման նիստը
2 րոպեի ընթերցում
Գավառի համայնքապետարանում կայացել է «Մասնակցային բյուջետավորում» գործընթացի առաջարկների նախնական գնահատման նիստը, որը վարել է գնահատող հանձնաժողովի նախագահ, Գավառ համայնքի ղեկավարի առաջին տեղակալ Գրիգոր Դաշտոյանը։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, գնահատող հանձնաժողովին, որի կազմում ընդգրկված են նաև համայնքապետարանի, ՀԿ-ների, ավագանու, մշտադիտարկում իրականացնող կազմակերպությունների ներկայացուցիչներ, համայնքապետարանի աշխատակիցներ Հակոբ Սարգսյանը և Հռիփսիմե Զանգիզորյանը ներկայացրել են գործընթացի բովանդակությունը, առաջարկների ընդհանուր նկարագիրը, որին հաջորդել են նախաձեռնությունների մանրամասն ներկայացումները։
«Այս տարի Գավառ քաղաքից և բնակավայրերից ներկայացվել են ինը ծրագրային առաջարկներ, որոնք ուղղված են համայնքային զարգացման տարբեր ոլորտներին․ դրանք մշակութային, կրթական, մարզական, ենթակառուցվածքային և հանրային միջավայրի բարելավման նախաձեռնություններ էին։ Նախնական գնահատման փուլն իրականացվել է հաստատված ընթացակարգերին և մասնակցային բյուջետավորման ուղեցույցի պահանջներին համապատասխան։ Հանձնաժողովի կողմից հավանության արժանացած և հանրային լսման փուլ անցած առաջարկները կներկայացվեն ավագանու հաստատմանը, որին կհաջորդեն հանրային քննարկումներն ու քվեարկությունը»,-ներկայացրին Գավառի համայնքապետարանի աշխատակազմից։
Բաժանորդագրվեք մեր ալիքին Telegram-ում