1 րոպեի ընթերցում
Ուկրաինայում բազմազգ ուժերի ձևավորումն ու տեղակայումը՝ որպես անվտանգության երաշխիք, հնարավոր չէ առանց Ռուսաստանի համաձայնության։ Ինչպես տեղեկացնում է «Արմենպրես»-ը, վկայակոչելով Der Spiegel-ը, ասուլիսի ժամանակ այս մասին հայտարարել է Գերմանիայի կանցլեր Ֆրիդրիխ Մերցը։
Մերցի խոսքով՝ Եվրամիությունը ներկայումս դեռ բավականին հեռու է ռուսական կողմի համաձայնությունը ստանալուց։ Նրա գնահատմամբ՝ գործողությունների հստակ հերթականություն պետք է պահպանվի։
«Գործողությունների կարգը պետք է լինի հետևյալը․ նախ հրադադար, ապա անվտանգության երաշխիքներ Ուկրաինայի համար և երկարաժամկետ համաձայնագիր Ռուսաստանի հետ։ Եվ դրանցից ոչ մեկը հնարավոր չէ առանց Ռուսաստանի համաձայնության։ Իսկ մենք, հավանաբար, դեռ բավականին հեռու ենք դրանից»,- ասել է Գերմանիայի կանցլերը։
Մերցը նաև նշել է, որ իր գնահատմամբ Ռուսաստանը ներկայում չի ձգտում դադարեցնել կրակը։
«Ուստի մենք պետք է շարունակենք բարձրացնել այս պատերազմի գինը, որպեսզի Ռուսաստանը հասկանա, որ այն շարունակելու իմաստ չկա»,- հավելել է նա։