1 րոպեի ընթերցում
Հայաստանի վարչապետ Նիկոլ Փաշինյանը հայտնեց, թե ինչու է որոշում կայացվել վարչապետին սպասարկող ավտոմեքենայի «001 ՍՍ» հնգանիշ պետհամարանիշը փոխարինել «1» պետհամարանիշով:
«Արմենպրես»-ի փոխանցմամբ՝ Փաշինյանը թեմային անդրադարձավ լրագրողների հետ ճեպազրույցի ընթացքում:
«Որոշակի ինդիկացիա է եղել, որ գործող համարանիշի վրա գրվող հայերեն «ՍՍ» տառերը արձանագրվել են որպես Սերժ Սարգսյանի անվան սկզբնատառեր: Մենք կարծում ենք, որ պետական համարանիշը չպետք է որևէ մեկի անվանատառը կրի»,- ասաց Փաշինյանը:
Վարչապետն անդրադարձավ նաև դիտարկմանը, թե նախկինում քննադատել է պետական պաշտոնյաների, այդ թվում՝ վարչապետին սպասարկող մեքենաների համար «գոլդ» համարանիշների օգտագործումը:
«Մենք ժամանակի ընթացքում որոշ մոտեցումներ վերանայել ենք այն տրամաբանությամբ, որ, այնուամենայնիվ, պետական որոշակի ատրիբուտներ կան, որ պարտավոր ենք պահել, պետական արարողակարգի հարց է»,- նշեց վարչապետը:
Վարչապետին սպասարկող մեքենայի պետհամարանիշի փոփոխության վերաբերյալ որոշումն ընդունվել է ՀՀ կառավարության հունվարի 8-ի նիստում: