2 րոպեի ընթերցում
Հայաստանի պետական սիմֆոնիկ նվագախումբն այս օրերին Չինաստանում է, որտեղ դիրիժոր Սերգեյ Սմբատյանի գլխավորությամբ նվագակցում է Խաչատրյանի անվան միջազգային մրցույթի եզրափակիչ փուլ անցած մասնակիցներին։
«Արմենպրես»-ի փոխանցմամբ՝ այս մասին հաղորդագրություն է տարածել Հայաստանի պետական սիմֆոնիկ նվագախմբի մամուլի ծառայությունը։
Մրցույթը կազմակերպվում է «Արամ Խաչատրյան» մշակութային հիմնադրամի կողից։ Այս տարի այն անցկացվում է «թավջութակ» անվանակարգում։ Մասնակցում են թավջութակահարներ աշխարհի տարբեր ծայրերից։
Հարկ է նշել, որ Խաչատրյանի անվան միջազգային մրցույթն այն եզակի մշակութային նախագծերից է, որն ունի լայն աշխարհագրություն և իրականացվում է նաև Հայաստանից դուրս։ Արդեն երրորդ տարին է, որ «Արամ Խաչատրյան» մշակութային հիմնադրամի ջանքերով և չինացի գործընկերների հետ համագործակցությամբ մրցույթը կազմակերպվում է նաև Չինաստանում՝ այս երկրում Արամ Խաչատրյանի անվան շուրջ համախմբելով մեծաթիվ երաժիշտների ու աշխարհին ներկայացնելով հայ մեծ կոմպոզիտորի մշակութային ժառանգությունը, ինչը մեծ ձեռքբերում է Խաչատրյանի արվեստը հանրայնացնելու ճանապարհին։ Մրցույթի գալա համերգն ու պարգևատրման արարողությունը կկայանան դեկտեմբերի 27-ին Պեկինի ազգային օպերային թատրոնում։
Հայաստանի պետական սիմֆոնիկ նվագախումբն առանձին համերգներով հանդես կգա նաև Չինաստանի երեք քաղաքներում։
Մրցութային փուլերը և հունվարի 1-ին կայանալիք համերգը հեռարձակվում են չինական հեռուստաընկերություններով ու դասական երաժշտության այլ հարթակներով՝ բազմահազարանոց լսարանին նույնպես առցանց տիրույթում հաղորդակից դարձնելով համերգներին։