ՌԴ Տեմրյուկի նավահանգստի նավթի երկու պահեստարանում ԱԹՍ-ների հարվածից հրդեհ է բռնկվել

ՌԴ Կրասնոդարի երկրամասի Տեմրյուկի նավահանգստում անօդաչու թռչող սարքերի հարձակման հետևանքով հրդեհ է բռնկվել նավթի երկու պահեստարանում։ «Արմենպրես»-ի փոխանցմամբ՝ այս մասին Telegram-ում հայտնել է Կրասնոդարի երկրամասի օպերատիվ շտաբը։ 

Հրդեհն ընդգրկում է մոտ 2000 քառակուսի մետր տարածք։ Հրդեհի մարմանը մասնակցում է 70 հրշեջ, 18 միավոր տեխնիկա։

Նախնական տեղեկությունների համաձայն՝ տուժածներ չկան։

Իր հերթին, Մոսկվայի քաղաքապետ Սերգեյ Սոբյանինը հայտնել է, որ գիշերը խոցվել է Մոսկվայի ուղղությամբ եկող ինը անօդաչու թռչող սարք։ 

Ընդհանուր առմամբ, ըստ ՌԴ պաշտպանության նախարարության՝ լույս դեկտեմբերի 25-ի գիշերը երկրի շրջաններում և Ազովի ծովի երկնքում խոցվել է 141 ուկրաինական ԱԹՍ։ 

Հարվածների է ենթարկվել նաև Ուկրաինան։ Կիևում գիշերը երկու անգամ օդային տագնապ է հայտարարվել։ Օդային տագնապ է հայտարարվել նաև Չեռնիգովի, Սումիի, Խարկովի, Դնեպրոպետրովսկի, Զապորոժիեի և Դոնեցկի մարզերում։