4 րոպեի ընթերցում
Մհեր Մկրտչյանի անվան արտիստական թատրոնում դեկտեմբերի 21-ին «Տարեգիծ» խորագրով համերգով «Մենք» ազգային-ավանդական պարի խումբը նշեց իր տարեդարձը և ամփոփեց ընթացիկ տարվա ձեռքբերումները:
Ինչպես նշեց «Մենք»-ի հիմնադիր Ստեփան Թորոյանը, դա իրենց սոցիալական հաշվետվությունն է տարվա ընթացքում կատարած աշխատանքի մասին: Թորոյանի խոսքով, այս տարի «Մենք»-ի խմբերը շատացել են՝ հասնելով 10-ի. դրանք թե սիրողական, թե պրոֆեսիոնալ խմբեր են, որտեղ այս պահին ազգային պարեր է սովորում շուրջ 200 սան: «Մենք»-ում համոզված են, որ ազգային պարը երեխաների դաստիարակության կարևորագույն բաղկացուցիչներից մեկն է, որովհետև դրա միջոցով մարդը հոգևոր կերպով կապվում է իր նախնիների, իր արմատների հետ և ավելի լավ է ըմբռնում հայրենիքի գինը: Այդ գաղափարից ելնելով «Մենք»-ը հիմնել է մանկական խմբեր ոչ միայն Երևանում, այլև մարզերում և այդ գործընթացը ծրագրում է շարունակական դարձնել:
«Հայկական ֆոլկլորը ոչ այնքան բեմական, որքան մասնակցային մշակույթ է, մենք բեմն ուղղակի որպես գործիք կամ միջոց ենք ծառայեցնում ցուցադրելու հայկական մշակույթը և ասելու, որ երբեք ուշ չէ, միշտ էլ կարելի է սովորել ազգային պարեր»,-«Արմենպրես»-ի հաղորդմամբ՝ ընդգծում է Ստեփան Թորոյանը:
Համերգը մեկնարկեց սիրողական խմբի կատարմամբ՝ Հայրիկ Մուրադյանի «Ամռան գիշեր» երգի հնչյունների ներքո՝ նվիրված հայկական ֆոլկլորի մեծ բանահավաքի 120 ամյա հոբելյանին:
Միջոցառման ընթացքում ելույթ ունեցան ոչ միայն պրոֆեսիոնալ ու սիրողական խմբերն իրենց մեծ ու փոքր անդամներով, այլև «Մենք»-ի Ճապոնիայի մասնաճյուղերի՝ Տոկիոյի և Կիոտոյի խմբերի սաները՝ հեռավար տարբերակով: Անցյալ տարվանից Ճապոնիայի ժողովրդական պարերի ազգային ֆեդերացիայի հետ համագործակցության արդյունքում «Մենք»-ը 2 խումբ ունի Ճապոնիայում, ուր հաճախում և մեծ խանդավառությամբ հայկական էթնիկ պարեր են սովորում ու պարում տարբեր տարիքի ճապոնացիներ:
Ճապոնիայի մասնաճյուղերի պարուսույցները՝ Րյոտարո Իտոն և Յոշիտոմո Հորիկավան իրենց շնորհավորական ուղերձներով հույս հայտնեցին, որ մոտ ապագայում կկարողանան պարել «Մենք» խմբի հետ՝ Հայաստանում:
Համերգին ներկա էին Հայաստանում Ճապոնիայի դեսպանության ներկայացուցիչները, Ճապոնիայում Հայաստանի նախկին դեսպան Արեգ Հովհաննիսյանը և ճապոնագետ, Հայ-ճապոնական էսքիզներ գրքի հեղինակ Աննա Վարդանյանը:
«Մենք»-ը՝ որպես պարի խումբ ստեղծվել է 2012 թվականին և 13 տարի է զբաղվում է ազգային պարերի տարածմամբ ու ուսուցմամբ: Գործունեության ընթացքում խումբն ունեցել է ավելի քան 800 սան:
2022 թվականից «Մենք»-ը դարձել է կրթամշակութային ՀԿ, որը զբաղվում է ազգային պարերի տարածմամբ, ինչպես նաև հայկական ասեղնագործության, ազգային խաղերի և ծիսատոնական արարողությունների հանրահռչակմամբ:
«Մեր նպատակը հիմնականում հայ ժողովրդին մեր ազգային մշակույթը վերադարձնելն է, որովհետև այն վերջին 100-ամյակում այնքան էլ չի պահպանվել, և ձեռք բերած անկախությունը ճիշտ ժամանակն ու վայրն է ազգային մշակույթը վերականգնելու համար»,-նշեց Ստեփան Թորոյանը: