ՀՀ փոխվարչապետն ու ԶՖԳ պատվիրակության անդամները քննարկել են առաջիկա համագործակցության նոր ուղղությունները
2 րոպեի ընթերցում
Հայաստանի Հանրապետության փոխվարչապետ Տիգրան Խաչատրյանն ընդունել է Զարգացման ֆրանսիական գործակալության ընդլայնման և եվրոպական հարևանության հարցերով տարածաշրջանային տնօրեն Մաթյո Վասյորի գլխավորած պատվիրակությանը:
«Արմենպրես»-ի հաղորդմամբ՝ այս մասին հայտնում են ՀՀ կառավարությունից՝ նշելով, որ հանդիպմանը ներկա է եղել նաև Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին:
«Ողջունելով հյուրերին՝ փոխվարչապետը շնորհավորել է գործընկերներին Հայաստանում ԶՖԳ գրասենյակի բացման կապակցությամբ՝ վստահություն հայտնելով, որ այն նոր խթան կհաղորդի Հայաստանի և Ֆրանսիայի միջև զարգացման գործընկերության ընդլայնմանը»,-ասված է կառավարության տարածած հաղորդագրության մեջ:
Նշվում է, որ հանդիպման ընթացքում մանրամասն անդրադարձ է կատարվել երկկողմ օրակարգի մի շարք հարցերի, այդ թվում՝ քաղաքականության վրա հիմնված բյուջետային աջակցության ծրագրերի, ջրային ոլորտի ինստիտուցիոնալ զարգացման, ինչպես նաև ոռոգման ենթակառուցվածքների զարգացման վերաբերյալ:
Հաղորդվում է, որ հատուկ ընդգծվել է Տնտեսական համագործակցության խթանման և մասնակցության ընկերության (Պրոպարկո) հիմնադրամի գործունեության շրջանակներում մասնավոր հատվածի հետ համագործակցության ընդլայնման կարևորությունը:
Բացի այս, զրուցակիցները մտքեր են փոխանակել նաև առաջիկա համագործակցության նոր ուղղությունների վերաբերյալ: