ՀՀ կառավարությունը 3 միլիարդ 435 միլիոն 646,8 հազար դրամ է հատկացրել Գեղարքունիքի սուբվենցիոն ծրագրերի համար

ՀՀ  կառավարության հերթական նիստում որոշում է կայացվել Գեղարքունիքի մարզին սուբվենցիոն ծրագրերի համաֆինանսավորման նպատակով հատկացնել 3 միլիարդ 435 միլիոն 646,8 հազար դրամ։ 

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, հատկացումներն արվել են մարզի Մարտունի, Գավառ, Սևան, Վարդենիս և Ճամբարակ համայնքներում կառուցված համայնքային նշանակության ճանապարհների հիմնանորոգման, խմելու և ոռոգման ջրատարների, ջրահավաք ավազանների, խորքային հորերի կամ օրվա կարգավորիչ ջրամբարների կառուցման կամ վերակառուցման, արտաքին լուսավորության ցանցերի կառուցման, մշակույթի տների հիմնանորոգման, մի շարք այլ ուղղություններում իրականացված աշխատանքների համար։ 

1 միլիարդ 656 միլիոն 860 հազար 600 դրամ հատկացվել է Մարտունի համայնքում, 936 միլիոն 707 հազար 300 դրամ՝ Վարդենիս համայնքում իրականացված աշխատանքների համար։ Սևան համայնքում իրականացված աշխատանքների համար հատկացվել է 553 միլիոն 293 հազար 400 դրամ, Ճամբարակ համայնքում իրականացված աշխատանքների համար՝ 210 միլիոն 598 հազար 400 դրամ, Գավառ համայնքում իրականացված աշխատանքների համար՝ 78 միլիոն 187 հազար 500 դրամ։