3 րոպեի ընթերցում
Սոցիալ Դեմոկրատ Հնչակյան կուսակցության կենտրոնական վարչությունը դեկտեմբերի 9-ին հայտարարություն է տարածել՝ հայտարարելով, որ Սբ Էջմիածնի հոգևոր-վարչական կառույցը արմատական վերանայման կարիք ունի:
«Արմենպրես»-ը ներկայացնում է կուսակցության հայտարարությունը.
«Սոցիալ Դեմոկրատ Հնչակյան Կուսակցությունը շարունակում է խոր մտահոգությամբ հետևել Մայր Աթոռ Սբ Էջմիածնից ներս և նրա շուրջ տեղի ունեցող իրադարձություններին, որոնք վստահաբար հուզում են յուրաքանչյուր հայու հոգին, անկախ դավանանքային պատկանելիությունից:
Աներկբա է, որ ներկա ճգնաժամի գլխավոր դրդապատճառը քաղաքական է և սկիզբ առավ այն պահից, երբ Գարեգին Բ կաթողիկոսը միացավ վարչապետի հրաժարականի պահանջին։ Ավելին, ընդդիմության նախաձեռնած իշխանափոխության մի քանի ձախող փորձերից հետո, Մայր Աթոռի որոշ բարձրաստիճան կղերականներ փաստորեն վերցրեցին այդ գործընթացի առաջնորդությունը, այդպիսով եկեղեցին ներքաշելով քաղաքական պայքարի հորձանուտ:
Անշուշտ, նրանք նման քայլի չէին կարող դիմել առանց Էջմիածնի գահակալի անմիջական համաձայնության և օրհնության: Այդ ընթացքում, Մայր Աթոռի մի շարք հոգևորականների մասին սկսեցին ի հայտ գալ տառատեսակ բացաhայտումներ և խախտումներ, որոնք առ այսօր չեն արժանացել Մայր Աթոռի հստակ և համոզիչ հաստատումին, հերքումին կամ պատշաճ տնօրինությանը:
Այս ամենը մեզ մղում են մտածելու, որ Մայր Աթոռ Սբ Էջմիածնի վարչական համակարգից ներս տիրում է նախորդ իշխանությունների գործելաոճին համահունչ իրողություն, ուր բացակա է թափանցիկ հաշվետվությունը և առկա են օրենքների շրջանցումն ու անձնական նախասիրությունների կիրառումը։
Հայ Առաքելական եկեղեցին ազգային կառույց է և որպես մեր ազգի հոգևոր պատկեր, ընդունելի չէ, որ նրա երկնակամարը ծածկված լինի կասկածի ու առեղծվածի սև ամպերով: Մենք տասնամյակներ շարունակ պայքարել ենք Մայր Աթոռի գերակայությունը պաշտպանելու համար, և մեզ համար մեծ ցավ է տեսնել Եկեղեցու շուրջ տեղի ունեցող այս անհաճո զարգացումները։
Սբ Էջմիածնի հոգևոր-վարչական կառույցը արմատական վերանայման կարիք ունի և այդ առումով մենք ողջունում ենք տիրող իրավիճակից դուրս գալու նպատակով մի խումբ եպիսկոպոսների կողմից վերջերս հրապարակված հայտարարությունը և միանում ենք կաթողիկոսին ուղղված նրանց հորդորին։ Հայ Առաքելական եկեղեցին ինքնամաքրման և վերանորոգման հրամայականի առջև է այսօր»։