Գենդերային բռնության կանխարգելման համար կարևորվում է հանդուրժող և համերաշխ միջավայրի ձևավորումը. ՀՀ ՄԻՊ
2 րոպեի ընթերցում
«Ընդդեմ գենդերային բռնության ակտիվության 16-օրյակ» ծրագրի շրջանակում Մարդու իրավունքների պաշտպան Անահիտ Մանասյանը Գեղագիտության ազգային կենտրոնի «Փոքր թատրոնում» ներկա է գտնվել Հովհաննես Թումանյանի «Մարո»-ի մոտիվներով բեմադրված «Մարի» ներկայացմանը։
«Արմենպրես»-ի հաղորդմամբ՝ «Մարի» ներկայացումը պատմում է Հայաստանում գենդերային բռնության իրական դեպքերի մասին՝ բացահայտելով այն համակարգային խնդիրները, որոնք առկա են ոլորտում: Այն անդրադառնում է ընտանեկան, հոգեբանական, տնտեսական, սեռական բռնությունների, վաղ ամուսնությունների, դրանց արձագանքմանն առնչվող և կանանց աշխատանքային իրավունքներին առնչվող մի շարք խնդիրների:
Մարդու իրավունքների պաշտպանը ներկայացման ավարտին հանդես է եկել խոսքով և ընդգծել հանդուրժող, համերաշխ և ապրումակցող միջավայր ունենալու կարևորությունը՝ մարդու իրավունքների պաշտպանության արդյունավետ համակարգ ունենալու և բռնության կանխարգելման տեսանկյունից:
«Ներկայացումն ամբողջությամբ նկարագրում էր բոլոր այն խնդիրները, որոնք այսօր ևս արդիական են։ Այդ առումով լրացուցիչ խոսք ասելու կարիք չեմ տեսնում: Այն ամենն, ինչը նկարագրվում է ներկայացման շրջանակներում, ցավոք, իրականություն է, և դրա դեմ պետք է պայքարել: Չափազանց կարևոր է, նաև, որպեսզի բռնության զոհ դարձած յուրաքանչյուր մարդ զգա, որ ինքը մենակ չէ, և այդ առումով մենք մեծ անելիք ունենք»,-ասել է Անահիտ Մանասյանը։
Միջոցառումն իրականացվել է «Ընդդեմ կանանց նկատմամբ բռնության կոալիցիա» և «Իրավունքի կենտրոն» ՀԿ-ների համագործակցությամբ՝ Գերմանիայի Դաշնային Հանրապետության արտաքին գործերի նախարարության աջակցությամբ։