2 րոպեի ընթերցում
Ուկրաինայի նախագահի գրասենյակի ղեկավար Անդրեյ Երմակը հայտարարել է, որ երկրի հակակոռուպցիոն մարմինները խուզարկություններ են իրականացնում իր բնակարանում։ «Արմենպրես»-ի փոխանցմամբ՝ այս մասին նա գրել է իր Telegram ալիքում։
«Այսօր Ուկրաինայի ազգային հակակոռուպցիոն բյուրոն և Մասնագիտացված հակակոռուպցիոն դատախազությունն իսկապես իրականացնում են դատավարական գործողություններ իմ տանը։ Հետաքննիչների համար որևէ խոչընդոտ չկա», - հաստատել է Երմակն իր տանը խուզարկությունների մասին ավելի վաղ ԶԼՄ-ներում տարածված լուրերը։
Նա նշել է, որ հետաքննիչներին տրվել է բնակարան մուտք գործելու լիարժեք հնարավորություն։ Երմակի փաստաբանները նույնպես ներկա են դեպքի վայրում և համագործակցում են իրավապահ մարմինների հետ։
Ավելի վաղ մի քանի լրագրողներ և պատգամավորներ հայտնել էին, որ Անդրեյ Երմակի կառավարական բնակարանում խուզարկություններ են իրականացվում։ Այդ տեղեկությունն ավելի ուշ հաստատել է նաև Ուկրաինայի ազգային հակակոռուպցիոն բյուրոն։ Ըստ բյուրոյի՝ բոլոր գործողությունները թույլատրվել են դատարանի կողմից և իրականացվում են քրեական հետաքննության շրջանակում։ Հետաքննիչները խոստացել են մանրամասները հրապարակել ավելի ուշ։
Խուզարկությունները տեղի են ունենում Ուկրաինայում կոռուպցիոն սկանդալի ֆոնին՝ կապված «Էներգոատոմ» պետական էներգետիկ ընկերության հետ։ Այս սկանդալը հանգեցրել է էներգետիկայի և արդարադատության նախարարների հրաժարականին: Սկանդալի առանցքային դեմքը գործարար Թիմուր Մինդիչն է, որն, ըստ լրատվամիջոցների, նախագահ Վոլոդիմիր Զելենսկու ընկերն է։