ՀԷՑ-ի մասնաճյուղի տեսուչի նկատմամբ հարուցվել է հանրային քրեական հետապնդում

ՀԷՑ-ի մասնաճյուղերից մեկի տեսուչի նկատմամբ հարուցվել է հանրային քրեական հետապնդում խոշոր չափերով խարդախություն կատարելու դեպքի առնչությամբ։ «Արմենպրես»-ի հաղորդմամբ՝ այս մասին հայտնում է ՀՀ քննչական կոմիտեն։

Նախաքննության ընթացքում պարզվել է, որ Գ. Խ.-ն, 2024 թվականի հունիսի 6-ից մինչև 2025 թվականի սեպտեմբերի 15-ը հանդիսանալով ՀԷՑ-ի տեսուչ, խարդախության եղանակով ներկայացրել է իրականությանը չհամապատասխանող էլեկտրաէներգիայի ծախսի տվյալներ։

Ըստ քննության՝ Գ. Խ.-ն մի քանի փողոցների լուսավորության համար սպառված էլեկտրաէներգիայի հաշվառիչի իրական ցուցմունքների փոխարեն համայնքապետարանին է ներկայացրել արհեստականորեն բարձրացված տվյալներ, ինչի հետևանքով համայնքապետարանին պատճառվել է 1 մլն 102 հազար 288 դրամի գույքային վնաս։

Գ. Խ.-ի նկատմամբ հարուցվել է հանրային քրեական հետապնդում ՀՀ քրեական օրենսգրքի 255-րդ հոդվածի 2-րդ մասի 3-րդ կետով (խոշոր չափերով խարդախություն)։ Նա ձերբակալվել է։ Նախաքննությունը շարունակվում է։