ՀՀ վարչապետը կարևորում է Ղազախստանի դերը Հայաստանի և Ադրբեջանի միջև խաղաղության գործընթացում

Հայաստանի վարչապետ Նիկոլ Փաշինյանը բարձր է գնահատում Ղազախստանի կարևոր դերը Հայաստանի և Ադրբեջանի միջև խաղաղության գործընթացում։ 

«Արմենպրես»-ի հաղորդմամբ՝ ՀՀ վարչապետն այդ մասին ասել է այս Աստանայում Ղազախստանի նախագահ Կասիմ-Ժոմարտ Տոկաևի հետ հանդիպումից հետո լրագրողների համար արված հայտարարության ժամանակ։ 

«Ղազախստանը շատ կարևոր ժամանակահատվածում Ալմա-Աթայում Հայաստանի և Ադրբեջանի արտաքին գործերի նախարարներին հանդիպման հարթակ տրամադրեց, և այդ բանակցությունները շատ կարևոր էին հետագա զարգացումների համար»,- ասաց Փաշինյանը։  

Վարչապետը նաև հիշեցրեց, որ այժմ Հայաստանի ու Ադրբեջանի միջև խաղաղության գործընթացի հիմքում Ալմա-Աթայի հռչակագիրն է։

«Այդ փաստաթուղթն ունի կոնկրետ քաղաքական, ինչպես նաև սիմվոլիկ նշանակություն»,- հավելեց Փաշինյանը։ 

Փաշինյանը նշեց, որ 2025 թվականի օգոստոսի 8-ին Վաշինգտոնում կայացած խաղաղության գագաթնաժողովից հետո անձամբ զանգահարել է Տոկաևին՝ տեղեկացնելու կարևոր բանակցությունների մասին։

«Դա նաև իմ գնահատանքի արտահայտությունն է այս ընթացքում Ձեր անձնական աջակցության, ինչպես նաև Ղազախստանի աջակցության համար»,- ընդգծեց Փաշինյանը։

Նիկոլ Փաշինյանը նաև շեշտել է, որ իր համար մեծ պատիվ է եղբայրական Ղազախստանի բարձրագույն պարգևին արժանանալը՝ շեշտելով, որ դա պարտավորեցնող է, և ինքը երախտապարտ է Ղազախստանի նախագահի նման փորձառու պետական և քաղաքական գործչի կողմից այդպիսի պատվի արժանանալու համար։ 

Փաշինյանը ընդգծեց, որ Տոկաևի գնահատականներն առանձնահատուկ կարևորություն ունեն։

«Դուք մի մարդ եք, ով միջազգային քաղաքականության մեջ ժամանակակից շոշափելի ներդրում է ունեցել, և իրադրությունը տեսնել Ձեր գնահատականի տեսակետից չափազանց կարևոր է, որովհետև ցանկացած զարգացում գնահատման և վերագնահատման անհրաժեշտություն ունի»,- ասաց Փաշինյանը։

Փաշինյանը նաև ընդգծեց իր այցի քաղաքական կարևորությունը։ 

«Այս պաշտոնական այցի արդյունքներով Հայաստանի և Ղազախստանի միջև հարաբերությունները հասնում են ռազմավարական գործընկերության կետի, ինչը նոր ցատկուղի է մեր հետագա հարաբերությունների զարգացման համար»,- եզրափակեց Փաշինյանը։