Սիրիայի ԱԳ նախարարն անդրադարձել է ՌԴ-ի, Իսրայելի հետ հարաբերություններին և Լոնդոնում Սիրիայի դեսպանատան վերաբացմանը
2 րոպեի ընթերցում
Լոնդոնում Սիրիայի դեսպանատան վերաբացումը կարևոր է Մեծ Բրիտանիայի հետ հարաբերություններն ամրապնդելու համար, հայտարարել է Սիրիայի արտաքին գործերի նախարար Ասաադ աշ-Շայբանին՝ ելույթ ունենալով Լոնդոնի Չաթեմ Հաուսում կայացած երկխոսության նիստում։ «Արմենպրես»-ի փոխանցմամբ՝ այս մասին հաղորդում է Syria TV-ն։
«Մեր դեսպանատունը, որ վերաբացվել է Լոնդոնում, կծառայի սիրիացիների շահերին և նորից չի վերածվի հետախուզության շտաբի», - ասել է նախարարը։
Նա նաև նշել է, որ Սիրիան կառուցում է իրատեսական հարաբերություններ Ռուսաստանի հետ։
«Մենք չենք ցանկանում լինել որևէ դաշինքի մաս և աշխատում ենք բոլորի հետ լավ հարաբերություններ ու գործընկերություն կառուցելու ուղղությամբ.... Մենք իրատեսական հարաբերություններ ենք կառուցում Ռուսաստանի հետ: Մենք չենք ցանկանում, որ նա վերահսկի Սիրիան, ինչպես նախկինում, և ոչ էլ ցանկանում ենք թշնամանալ նրա հետ», - նշել է աշ-Շայբանին:
Սիրիայի ԱԳ նախարարը նաև անդրադարձել է Սիրիայի տարածքների վրա Իսրայելի շարունակական հարձակումներին։
«Իսրայելը ներկայում բացասական դեր է խաղում Սիրիայում և դժգոհ է (Սիրիայում) տեղի ունեցած փոփոխություններից: Նա շարունակում է իր խախտումները սիրիական տարածքում, բայց մենք չենք ներքաշվել սադրանքների մեջ և փորձել ենք արձագանքել դիվանագիտորեն», - ասել է ԱԳ նախարարը:
Նրա խոսքով՝ իր երկիրը ցանկանում է հանգստություն և ձգտում է խուսափել Իսրայելի հետ լարվածության սրումից։
«Մենք աշխատում ենք Սիրիայի վերականգնման ուղղությամբ և դիտարկում ենք Իսրայելի հետ ցանկացած հնարավոր համաձայնագիր այս շրջանակում», - նշել է աշ-Շայբանին։
Նա հաստատել է, որ միջազգային հանրության մեծ մասն աջակցում է Սիրիայի կառավարության դիվանագիտական դիրքորոշմանն Իսրայելի խախտումների վերաբերյալ: