1 րոպեի ընթերցում
Նյու Դելիում ութ մարդու կյանք խլած մեքենայի պայթյունի գործով ձերբակալվել է առնվազն մեկ անձ։
Ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ին, այս մասին հայտնում է News18 հեռուստաալիքը։
«Աղբյուրները հայտնել են, որ Դելիի ոստիկանությունը ձերբակալել է պայթյունի հետ կապված մեկ կասկածյալի՝ հավելելով, որ սկսվել է բազմագերատեսչական հետաքննություն», - հաղորդել է հեռուստաալիքը։
Հնդկաստանի ներքին գործերի նախարար Ամիտ Շահը, ըստ տեղեկությունների, վարչապետ Նարենդրա Մոդիին տեղեկացրել է միջադեպի և հետաքննության ընթացքի մասին։
Ավելի վաղ հեռուստաալիքը հաղորդել էր, որ պայթյունը տեղի է ունեցել Դելիի «Կարմիր ամրոց» մետրոյի կայարանի 1-ին մուտքի մոտ՝ Հնդկաստանի ժամանակով ժամը 18:55-ին: Պայթյունը հրդեհ է առաջացրել և վնասել է մոտակա երեք կամ չորս մեքենաներին: Դեպքի վայր է մեկնել մոտ 15 հրշեջ մեքենա, իսկ ոստիկանությունը շրջափակել է ամբողջ տարածքը: Տարածքում երթևեկությունը նույնպես սահմանափակվել է:
Պայթյունի բնույթը դեռևս անհայտ է:
Պայթյունից հետո Նյու Դելիի իշխանությունները մայրաքաղաքում հայտարարել են բարձր տագնապի դրություն: