Քարոզարշավի ընթացքում բարեգործության արգելքը խախտելու կասկածանքով ձերբակալվել է Գեղակերտի դպրոցի տնօրենը

Հակակոռուպցիոն կոմիտեում նախաձեռնված քրեական վարույթի շրջանկաներում ձերբակալվել է Վաղարշապատ խոշորացված համայնքի Գեղակերտ բնակավայրի դպրոցի տնօրեն Անուշ Համբարձումյանը`ավագանու ընտրությունների քարոզարշավի ընթացքում բարեգործության արգելքը խախտելու կասկածանքով։ 

«Արմենպրես»-ի հետ զրույցում լուրը հաստատեցին ՀՀ հակակոռուպցիոն կոմիտեից։ 

«Հակակոռուպցիոն կոմիտեի կողմից իրականացված օպերատիվ-հետախուզական միջոցառումների արդյունքում ստացված տվյալների հիման վրա նախաձեռնվել է քրեական վարույթ բարեգործության արգելքը խախտելու դեպքի առթիվ։ Քրեական վարույթի շրջանակում ձերբակալվել է մեկ անձ, որի նկատմամբ կալանքը որպես խափանման միջոց կիրառելու միջնորդություն է ներկայացվել դատարան»,- հայտնեցին Հակակոռուպցիոն կոմիտեից։  

Ըստ մամուլում հրապարակված լուրերի՝ Անուշ Համբարձումյանը իշխող «Քաղաքացիական պայմանագիր» կուսակցության անդամ է։ 

Օրեր առաջ Newday.am-ը տեսանյութ էր հրապարակել՝ նշելով, թե ՔՊ-ական Անուշ Համբարձումյանն ընտրություններին զուգահեռ օգնություն է բաժանում։ Ավելի ուշ Համբարձումյանը ֆեյսբուքյան էջում պարզաբանում էր տարածել, թե «որոշ լրատվականներ, առանց հաշվի առնելու մարդու տարիներով կատարած բազմաթիվ բարեգործական կամավոր աշխատանքները, փորձում են այլ կերպ ներկայացնել, որը որևէ աղերս չունի իրականության հետ»։ 

Նոյեմբերի 10-ին Հակակոռուպցիոն կոմիտեն հայտարարություն էր տարածել՝ շեշտելով, որ Վաղարշապատ խոշորացված համայնքի ավագանու ընտրությունների քարոզարշավը ամենօրյա մշտադիտարկման տակ է։ Կոմիտեն քաղաքական ուժերին հորդորել էր զերծ մնալ ընտրողների կամքի վրա անօրինական միջոցներով ազդելու քայլերից՝ շեշտելով, որ նման դեպքերը կարժանանան խիստ իրավական գնահատականի։ 

Վաղարշապատ խոշորացված համայնքի ավագանու ընտրությունները կկայանան նոյեմբերի 16-ին։ Նախընտրական քարոզարշավը մեկնարկել է հոկտեմբերի 22-ին և կեզրափակվի նոյեմբերի 14-ին։