1 րոպեի ընթերցում
Իրանի արտաքին գործերի նախարար Աբբաս Արաղչին հայտարարել է, որ Իրանի պաշտպանական և հրթիռային կարողություններն ամրապնդվել են հունիսին տեղի ունեցած 12-օրյա պատերազմից հետո՝ ընդգծելով, որ թշնամուն չի հաջողվել հակամարտության ընթացքում հասնել իր նպատակներից որևէ մեկին։ «Արմենպրես»-ի փոխանցմամբ՝ այս մասին հայտնում է իրանական Tasnim գործակալությունը։
Ելույթ ունենալով Համադան նահանգի վարչական խորհրդի նիստում՝ Արաղչին նշել է, որ թշնամին 12-օրյա պատերազմի ընթացքում պարտվել է իր բոլոր նպատակներում։
Արաղչին նաև հավելել է, որ «հակամարտության ընթացքում սիոնիստական ռեժիմի երկինքը, չնայած իր բազմաշերտ պաշտպանական համակարգերին և արևմտյան օժանդակությանը, գտնվում էր իրանական հրթիռների հասանելիության սահմաններում»։ Նա շեշտել է, որ Իրանի տեղական արտադրության հրթիռները, որոնք առաջին անգամ օգտագործվել են իրական պատերազմում, դարձել են ավելի ճշգրիտ և արդյունավետ, քանի որ դրանց թույլ կողմերն ամեն օր բացահայտվել ու շտկվել են։
Նա դատապարտել է Իսրայելի գործողությունները Գազայում՝ հավելելով, որ ԱՄՆ-ի աջակցությամբ իսրայելական կողմը խախտել է միջազգային իրավունքի բոլոր սկզբունքները։