Գեղարքունիքում համարակալվել է 12426 գլուխ խոշոր և 104004 գլուխ մանր եղջերավոր կենդանի

Գեղարքունիքի մարզպետի աշխատակազմում ամփոփվել են  անասնապահության ոլորտում իրականացված աշխատանքները և արդյունքները 2025 թվականի առաջին ինն  ամիսների կտրվածքով։

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի գյուղատնտեսության և շրջակա միջավայրի պահպանության վարչությունից, 2025 թվականի հունվարին  խոշոր եղջերավոր կենդանիների գլխաքանակը կազմել է 71971 գլուխ, որը 2024 թվականի նույն ժամանակահատվածի  համեմատությամբ պակասել է 3858 գլխով։ Մանր եղջերավոր կենդանիների գլխաքանակը կազմել է 102543 գլուխ, որը 2024 թվականի համեմատությամբ ավելացել է 626 գլխով։

2025 թվականի հոկտեմբերի 15-ի  դրությամբ  մարզում իրականացվել են 376718 գլուխ խոշոր և 93929 գլուխ մանր եղջերավոր կենդանիների արյան նմուշառման ու պատվաստման աշխատանքներ: 

Այս տարվա հունվարի 1-ից մինչև հոկտեմբերի 1-ն ընկած ժամանակահատվածում մարզում համարակալվել է 12426 գլուխ խոշոր և 104004 գլուխ մանր եղջերավոր կենդանի։ Համարակալման և պատվաստման աշխատանքներն ընթացքի մեջ են: