Հազարավոր ուլտրա-ուղղափառ հրեաներ փակել են Երուսաղեմի մուտքը՝ բողոքելով բանակ զորակոչվելու դեմ

Հազարավոր ուլտրա-ուղղափառ հրեաներ հավաքվել են Երուսաղեմի մուտքի մոտ՝ բողոքելով Իսրայելի պաշտպանության բանակ զորակոչվելու դեմ: Ցուցարարները փակել են քաղաքի մուտքը։ «Արմենպրես»-ի փոխանցմամբ՝ այս մասին հայտնում է The Times of Israel-ը։

Երիտասարդ ուլտրա-ուղղափառ հրեաները պլաստիկ շշեր են նետել իսրայելական 12-րդ ալիքի լրագրողի վրա, երբ նա լուսաբանում էր զանգվածային հանրահավաքը։ Ցուցարարներից պաշտպանության համար ոստիկանության պաշտպանությանն են դիմել մի քանի լրագրողներ:

Իսրայելի լրագրողների միությունը հայտարարել է, որ «զբաղվում է Երուսաղեմի մուտքի մոտ ուլտրա-ուղղափառ հրեաների բողոքի ցույցի ժամանակ թղթակիցների և օպերատորների դեմ բռնության մասին հաղորդագրություններով»։

Բողոքի ցույցը սկզբնապես նախատեսված էր հոկտեմբերի 26-ին, սակայն հետաձգվել էր տարբեր ուլտրա-ուղղափառ խմբավորումների միջև առկա տարաձայնությունների պատճառով։

2024 թ. հունիսին Իսրայելի Գերագույն դատարանը միաձայն որոշում էր կայացրել զրկել ծայրահեղ ուղղափառ հրեաներին բանակ չզորակոչվելու իրավունքից, որից նրանք մինչ այդ օգտվում էին։