1 րոպեի ընթերցում
Հայաստանի կառավարությունը շարունակում է ջանքեր գործադրել Լեռնային Ղարաբաղից տեղահանվածների ինտեգրման գործընթացի ուղղությամբ:
«Արմենպրես»-ի փոխանցմամբ՝ այս մասին ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենի հետ համատեղ ասուլիսի ընթացքում ասաց Հայաստանի արտաքին գործերի նախարար Արարատ Միրզոյանը:
«Լրջագույն ջանքեր ենք գործադրում այն ուղղությամբ, որ տեղահանված մեր հայրենակիցները կարողանան ամբողջապես ինտեգրվել և իրենց կյանքը վերսկսել կամ շարունակել Հայաստանի Հանրապետությունում»,- ասաց նախարարը:
2023 թվականի սեպտեմբերին Լեռնային Ղարաբաղի դեմ Ադրբեջանի ռազմական ագրեսիայի հետևանքով շուրջ 120 հազար հայ Լեռնային Ղարաբաղից տեղափոխվել էին Հայաստան։ Կառավարությունն աջակցության տարբեր ծրագրեր է իրականացնում ԼՂ-ից բռնի տեղահանված անձանց համար։