Ապարանում անցկացվել է «Տանիքը՝ Հայաստան» միջոցառումը՝ նվիրված Ազգային փոքրամասնությունների օրվան
2 րոպեի ընթերցում
Ապարանի մշակույթի տանը հոկտեմբերի 5-ին տեղի է ունեցել «Տանիքը՝ Հայաստան» խորագրով տոնական միջոցառում, որը նվիրված էր Ազգային փոքրամասնությունների օրվան։ Նախաձեռնությունն իրականացվել է ՀՀ կառավարության հովանու ներքո՝ ԿԳՄՍ նախարարության ֆինանսավորմամբ և Հայաստանի պետական ֆիլհարմոնիայի նախաձեռնությամբ։
Տոնական ծրագրին մասնակցել են Հայաստանի ասորական, հրեական, հունական, եզդիական, գերմանական, ռուսական, բելառուսական, ուկրաինական, վրացական, քրդական և լեհական համայնքների ներկայացուցիչներ։
«Արմենպրես»-ի փոխանցմամբ՝ ԿԳՄՍ նախարարությունից հայտնում են, որ միջոցառումն ընդգրկել է երկու հիմնական բաղադրիչ՝ մշակույթ և խոհանոց։
Ծրագրի առաջին հատվածում՝ Ապարանի մշակույթի տան դահլիճում, կայացել է համերգային ծրագիր, որի ընթացքում տարբեր համայնքների երգի և պարի համույթները հանդես են եկել ազգային երգերով, պարերով և երաժշտական կատարումներով՝ արտացոլելով Հայաստանում ապրող ժողովուրդների բազմազան մշակութային ժառանգությունը։
Մշակութային ծրագրին հաջորդել է ազգային խոհանոցների ցուցադրությունը. հատուկ ձևավորված համտեսի անկյունում համայնքների ներկայացուցիչները ներկաներին հյուրասիրել են ավանդական ուտեստներ՝ ներկայացնելով դրանց բաղադրատոմսերն ու պատրաստման եղանակները։
«Տանիքը՝ Հայաստան» նախագծի նպատակն է ընդգծել ազգային փոքրամասնությունների մշակութային ներդրումը և Հայաստանի բազմազան մշակութային դիմագիծը։