1 րոպեի ընթերցում
Հանրապետության տարածքում հոկտեմբերի 3-ից օդի ջերմաստիճանը կբարձրանա 8-10 աստիճանով: «Արմենպրես»-ի փոխանցմամբ՝ այս մասին «Ֆեյսբուք»-ի իր էջում հրապարակած տեսանյութում հայտնել է Հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը:
«Վերջին 2 օրերին Սև ծովի ցիկլոնով պայմանավորված հանրապետության տարածքում օդի ջերմաստիճանը զգալի նվազել է, մի շարք շրջաններում տեղումներ են, բայց մենք ձեզ համար ունենք շատ լավ լուր:
Սկսած հոկտեմբերի 3-ից՝ այդ ցիկլոնն ամբողջությամբ դուրս կգա մեր տարածաշրջանից՝ իր տեղը զիջելով հարավ-արևմուտքի արևադարձային լայնություններից ներթափանցող տաք օդային հոսանքներին: Հոկտեմբերի 3-6 ընկած ժամանակահատվածում մեր երկիրը գտնվելու է այդ տաք հոսնանքերի ազդեցության գոտում, ինչի արդյունքում հոկտեմբերի 2-ի համեմատ հանրապետության ողջ տարածում օդի ջերմաստիճանը ցերեկային ժամերին աստիճանաբար բարձրանալու է մոտ 8-10 աստիճանով»,- ասել է նա:
Սուրենյանը հիշեցրել է նաև, որ սպասվում է տաք և սակավատեղում հոկտեմբեր: Ըստ կանխատեսումների՝ հանրապետության տարածքում ամսական միջին ջերմաստիճանը կլինի կլիմայական նորմայից բարձր 1-2 աստիճանով, իսկ տեղումների քանակը նորմայից պակաս: