367.29
Ուրսուլա ֆոն դեր Լայենը ողջունել է Գազայի հարցով ԱՄՆ նախագահի առաջարկը
2 րոպեի ընթերցում
Եվրահանձնաժողովի նախագահ Ուրսուլա ֆոն դեր Լայենը ողջունել է ԱՄՆ նախագահ Դոնալդ Թրամփի խաղաղության առաջարկը՝ Գազայում գրեթե երկու տարի շարունակվող պատերազմը դադարեցնելու վերաբերյալ։
«Արմենպրես»-ի փոխանցմամբ՝ այս մասին ֆոն դեր Լայենը նշել է X միկրոբլոգի գրառման մեջ։
«Ողջունում եմ նախագահ Դոնալդ Թրամփի հանձնառությունը Գազայում պատերազմը դադարեցնելու վերաբերյալ։ Խրախուսում եմ բոլոր կողմերին այժմ օգտվել այս հնարավորությունից»,- նշել է նա։
Լայենի խոսքով՝ ԵՄ-ն պատրաստ է իր ներդրումն ունենալ այդ հարցում։
«Թշնամական գործողությունները պետք է դադարեցվեն՝ Գազայի բնակչությանն անհապաղ մարդասիրական օգնություն տրամադրելով և բոլոր պատանդներին անհապաղ ազատ արձակելով։
Երկու պետությունների սկզբունքով կարգավորումը մնում է Մերձավոր Արևելքում արդար և երկարատև խաղաղության միակ կենսունակ ուղին, որտեղ իսրայելցի և պաղեստինցի ժողովուրդները կապրեն կողք կողքի, խաղաղության և անվտանգության մեջ՝ զերծ բռնությունից և ահաբեկչությունից»,- նշել է նա։
Գերմանիայի կառավարության խոսնակ Ստեֆան Կոռնելիուսը հայտարարել է, որ կանցլեր Ֆրիդրիխ Մերցը ողջունել է ԱՄՆ նախագահ Դոնալդ Թրամփի՝ Գազայի հակամարտության կարգավորման ծրագիրը և կոչ է արել պաղեստինյան ՀԱՄԱՍ շարժմանն ընդունել այն։
Սպիտակ տան կողմից ներկայացված Գազայի հակամարտության կարգավորման ծրագիրը նախատեսում է անկլավում ռազմական գործողությունների լիակատար դադարեցում և պաղեստինյան ՀԱՄԱՍ շարժման կողմից պահվող պատանդների ազատ արձակում 72 ժամվա ընթացքում: Ավելին, Գազայի հատվածն անցումային շրջանում կղեկավարվի տեխնոկրատների կոմիտեի կողմից մինչև պաղեստինյան կառավարության կողմից բարեփոխումների իրականացումը։ Գազայի հատվածում կտեղակայվեն միջազգային ուժեր և կսկսվեն հումանիտար օգնության մասշտաբային մատակարարումներ։ Բացի այդ, կստեղծվի հատուկ տնտեսական գոտի։ Նշվում է նաև, որ Գազայի հատվածից մարդկանց բռնի տեղահանում չի իրականացվելու։
Բաժանորդագրվեք մեր ալիքին Telegram-ում