Գրքի երևանյան միջազգային փառատոնն առաջին անգամ ներկայացվեց Գյումրիում

Գրքի երևանյան միջազգային փառատոնը այս տարի առաջին անգամ ներկայացվեց նաև Գյումրիում։ Ինչպես տեղեկացնում է «Արմենպրես»-ը, ՀՀ կրթության, գիտության, մշակույթի և սպորտի նախարարության նախաձեռնությամբ անցկացվող փառատոնը սեպտեմբերի 28-ին Հայաստանի մշակութային մայրաքաղաքում էր:

Գյումրու Թատերական հրապարակում կազմակերպված գրքի տոնավաճառին մասնակցեցին բազմաթիվ հրատարակչություններ, տպարաններ, գրախանութներ, գրադարաններ և կրթամշակութային հաստատություններ։ Մինչ փառատոնի պաշտոնական մեկնարկը տեղի ունեցավ բանաստեղծ Հովհաննես Գրիգորյանի հուշատախտակի բացումը՝ Գյումրու Ֆուրմանովի փողոցի 4-րդ նրբանցք, տուն 23 հասցեում՝ այն տանը, որտեղ ապրել է բանաստեղծը, իսկ Գյումրու Վարդան Աճեմյանի անվան պետական դրամատիկական թատրոնում գրքերի ընթերցումների շարքը մեկնարկեց՝ «Բոլորովին ուրիշ աշուն․ Հովհաննես Գրիգորյան-80» խորագրով։ Տեղի ունեցան հոբելյանական ընթերցումներ և զրույցներ։

Օրվա ընթացքում տեղի ունեցան նաև գրքերի շնորհանդեսներ՝ Գևորգ Թումանյանի «Հնձած խոտ» և Հովիկ Չարխչյանի «Երկիր անավարտ» գործերը։ Կազմակերպվեցին հանդիպումներ արձակագրեր Արամ Ավետիսի և Աշոտ Ստեփանյանի, ինչպես նաև ժամանակակից գրողներ Հասմիկ Սիմոնյանի, Եր Կարի և Անուշ Քոչարյանի հետ։  Ավելի ուշ նախատեսված է նաև «ստենդափ» ձևաչափով հանդիպում՝ Արմեն Սարգսյանի, Վազգեն Օհանյանի, Տիգրան Գևորգյանի և Արմեն Ղանդիլյանի մասնակցությամբ։

ՀՀ ԿԳՄՍ նախարար Ժաննա Անդրեասյանը, պատասխանելով լրագրողների հարցերին, նշեց, որ Գրքի երևանյան միջազգային փառատոնն ամեն տարի ընդլայնվում է թե՛ մասնակիցների և հրատարակչությունների, թե՛ վաճառվող գրքերի քանակով։ 

«Փառատոնը դառնում է միջազգային, և մենք հյուրընկալում ենք գրողներ աշխարհի տարբեր երկրներից։ Սակայն մեզ համար կարևոր էր նաև փառատոնը տարածել դեպի մարզեր՝ խթանելու համար ընթերցանության և գրքի մշակույթը։ Այս տարի առաջին անգամ նախաձեռնեցինք փառատոնի անցկացումը Գյումրիում և Կապանում։ Սա շատ կարևոր միջավայր է հատկապես ուսանողների և դպրոցականների համար։ Նախարարությունն ունի մի շարք ծրագրեր՝ աջակցելու գրահրատարակչության ոլորտին, գրողներին, թարգմանական գրականությանը, ինչպես նաև մեր գրողների ստեղծագործությունները այլ լեզուներով թարգմանելու և միջազգային շուկաներում ներկայացնելու համար։ Նախորդ տարի մենք կարևոր փոփոխություն արեցինք՝ ծրագրում ներառելով գրական ստեղծագործությունների բեմադրում թատրոններում, որպեսզի ժամանակակից գրականությունը ապրի ամբողջական ստեղծագործական շղթայով՝ գրվի, ներկայացվի, տարածվի»,- հավելեց ՀՀ ԿԳՄՍ նախարար Ժաննա Անդրեասյանը:

«Այս տարի  Երևանում մենք ունեցանք ավելի քան 40 հազար այցելու, տասնյակ երկրների գրողներ և 18 հազար վաճառված գիրք։ Դա վեց անգամ ավելի է, քան առաջին տարին, ինչը խոսում է փառատոնի կայացման և կարևորության մասին։ Փառատոնը դառնում է ոչ միայն սիրված, այլ նաև ազդեցիկ մշակութային իրադարձություն»,- նշեց փառատոնի տնօրեն Անի Ղազարյանը։

Նշենք, որ փառատոնը հոկտեմբերի 4-ին կլինի նաև Կապանում։

Գրքի երևանյան միջազգային փառատոնը՝ որպես Հայաստանում գրականության և գրահրատարակչության ոլորտի ամենամեծ իրադարձություններից մեկը, անցկացվում է 2017 թվականից։ Փառատոնի հիմնադիրը ՀՀ կրթության, գիտության, մշակույթի և սպորտի նախարարությունն է, գլխավոր հովանավորը՝ Երևանի քաղաքապետարանը։ Այն իրականացվում է Եղիշե Չարենցի անվան գրականության և արվեստի թանգարանի և «Գրքի փառատոն» կրթամշակութային հասարակական կազմակերպության կողմից՝ Ստեղծագործ Եվրոպայի «Վերսոպոլիս» նախագծի աջակցությամբ։