Cisco Systems ընկերությունը փոխըմբռնման հուշագրեր է կնքել ՀՀ ԲՏԱ նախարարության, «Թումո»-ի և Տեխնոլոգիական կրթության հիմնադրամի հետ
3 րոպեի ընթերցում
ՀՀ բարձր տեխնոլոգիական արդյունաբերության նախարար Մխիթար Հայրապետյանի մասնակցությամբ սեպտեմբերի 17-ին տեղի է ունեցել ԲՏԱ նախարարության և «Սիսկո Ինթերնեշնլ Լիմիթեդ» ընկերության միջև փոխըմբռնման հուշագրի ստորագրման հանդիսավոր արարողությունը: Հուշագրի նպատակն է խթանել և զարգացնել տեխնոլոգիական կրթությունը Հայաստանում։
Ինչպես «Արմենպրես»-ին տեղեկացրին ՀՀ բարձր տեխնոլոգիական արդյունաբերության նախարարությունից, միջոցառման շրջանակում «Սիսկո» ընկերությունը փոխըմբռնման հուշագրեր է ստորագրել նաև «Թումո» ստեղծարար տեխնոլոգիաների կենտրոնի և Տեխնոլոգիական կրթության հիմնադրամի հետ:
Նախարար Հայրապետյանը, շնորհավորելով հուշագրերի ստորագրման առթիվ, ընդգծել է, որ այս համագործակցությունը նոր հնարավորություններ է ստեղծում հուշագրերը ստորագրող բոլոր կողմերի համար։
Նախարարի խոսքով՝ պետության համար կարևոր է Հայաստանում գործող ցանկացած տեխնոլոգիական ընկերության գործունեությունը, սակայն առանձնահատուկ գնահատանքի է արժանի այն փաստը, որ որոշ ընկերություններ նաև ռազմավարական ներդրումներ են անում մեր երկրում մարդկային կապիտալի զարգացման ծրագրերում՝ ուղղված մասնագիտական ներուժի զարգացմանը, կրթության և նորարարության խթանմանը։
««Սիսկո»-ն այն ընկերություններից է, որը միանում է Կառավարության ջանքերին՝ նպաստելով մրցունակ տնտեսության ձևավորմանը։ Այս հուշագրով ամրապնդում ենք այդ համագործակցությունը՝ հնարավորություն ընձեռելով աշակերտներին և ուսանողներին հասանելիություն ունենալ ժամանակակից տեխնոլոգիական կրթական ծրագրերին՝ կիբեռանվտանգությունից մինչև ցանցային ավտոմատացում»,- նշել է նախարարը։
Ըստ աղբյուրի՝ հուշագիրը հիմնված է «Սիսկո» ընկերության կողմից մեկնարկած «Ցանցային ակադեմիա» (Cisco Networking Academy) ծրագրի վրա, որի նպատակը մասնագետների պատրաստումն է՝ համակարգչային ցանցերի նախագծման, կառուցման և սպասարկման համար անհրաժեշտ գիտելիքներով ու հմտություններով։
Այս ակադեմիական նախաձեռնության ներդրումը Հայաստանի կրթական համակարգում կնպաստի երիտասարդ սերնդի տեխնոլոգիական հմտությունների զարգացմանը և երկրի թվային վերափոխման գործընթացի առաջխաղացմանը։
Միջոցառմանը մասնակցել են նաև Cisco Systems-ի թվայնացման ծրագրերի տնօրեններ Սարո Խաչատուրյանը և Ահմեդ ԷլՔաբանին, ինչպես նաև գործընկեր կազմակերպությունների ներկայացուցիչներ՝ «Թումո» ստեղծարար տեխնոլոգիաների կենտրոնի զարգացման գծով տնօրեն Բեկոր Փափազյանը և Տեխնոլոգիական կրթության հիմնադրամի գործադիր տնօրեն Լևոն Թադևոսյանը։